މާލޭގައި މީހަކު ރަހީނުކޮށް އިނގިއްޔެއް ބުރިކޮށްލި މައްސަލައިގައި ތިން މީހަކު ޝަރީއަތް ނިމެންދެން ބަންދު ކުރުމަށް އަމުރުކޮށްފިއެވެ.
މި މައްސަލައިގެ ތުހުމަތުގައި ހައްޔަރު ކޮށްފައިވަނީ އުމުރުން 18 އަހަރު، 21 އަހަރު އަދި 23 އަހަރުގެ ދިވެހި ފިރިހެނުންނެވެ. މި މީހުންނަށް ކުރަނީ ތޫނު ހަތިޔާރު ބޭނުންކޮށްގެން މާރާމާރީ ހިންގުމާއި، މީހެއްގެ ގައިގައި ޖެހުމާއި ހުއްދަ ނޫން ގޮތެއްގައި މީހަކު ހިފަހައްޓުގެ ތުހުމަތެވެ.
މި ތިން މީހުންގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އެ ތިން މީހުން ޝަރީއަތް ނިމެންދެން ބަންދު ކޮށްފައެވެ.
މި ތިން މީހުންގެ ބަންދު އަމުރުގައި ބުނެފައިވަނީ މި ތިން މީހުންނާ ދެކޮޅަށްވެސް އެކަށޭނަ ހެކި ހުށަހަޅާފައިވާ ކަމަށެވެ. އެގޮތުން ތަހުގީގު ބަޔާންތަކާއި ސީސީޓީވީ ފުޓޭޖްގެ ސްނެޕްޝޮޓްތަކާއި އަނިޔާ ލިބުނު ފަރާތަށް ލިބިފައިވާ އަނިޔާތައް ފެންނަ ފޮޓޯތަކާއި އިންޓެލިޖެންސް ރިޕޯޓާއި އެނޫންވެސް ހެކި ހުށަހަޅާފައިވާ ކަމަށެވެ.
މި ތިން މީހުންވެސް ބުނެފައިވަނީ، މި މައްސަލައިގައި އަނިޔާލިބުނު ފަރާތަކީ އެމީހުންނާއެކު މަސައްކަތްކުރި މީހެއް ކަމަށާއި އެމީހާ ރަހީނު ކޮށްފައި ނުވާކަމަށެވެ. އަދި އިނގިލި ބުރި ނުކުރާ ކަމަށާއި، ޕަވަރޓޫލެއް ބޭނުންކުރަނިކޮށް އަނިޔާ ލިބުނީ ކަމަށްވެސް މި މައްސަލައިގައި ތުހުމަތު ކުރެވޭ މީހުން ބުނެފައިވެއެވެ. މި ތިން މީހުންވެސް ވަނީ މި ތުހުމަތުތަކަށް އިންކާރު ކޮށްފައެވެ.
އެހެންނަމަވެސް އަނިޔާ ލިބުނު ފަރާތުގެ ފޮޓޯތަކަށް ބަލާއިރު ޖިސްމާނީ އަނިޔާ ގަސްދުގައި ދީފައިވާކަމަށް ބެލެވޭ ކަމަށް ކޯޓު އަމުރުގައި ފާހަގަ ކޮށްފައިވެއެވެ.
މި މައްސަލައިގައި ތިން މީހުން ޝަރީއަތް ނިމެންދެން ބަންދު ކުރުމަށް އަމަރުކޮށްފައިވާއިރު، މައްސަލައިގެ ތަހުގީގު ވީއެންމެ އަވަހަކަށް ނިންމުމަށްފަހު ދައުވާކުރުމާމެދު ގޮތެއް ނިންމުމަށް ޕީޖީ އޮފީހަށް ހުށަހަޅަންވާނެކަމަށް ކޯޓު އަމުރުގައި ބުނެފައިވެއެވެ.