އިސްލާމިކް ޔުނިވާސިޓީ (އައިޔޫއެމް) ހިންގަން ހުޅުމާލެ އިން ބިމެއް ހަމަޖައްސައިފި އެވެ.
އެ ޔުނިވާސިޓީއަށް 45 އަހަރު ފުރުމާ ގުޅިގެން ރޭ ބޭއްވި ހަފުލާއެއްގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ޔުނިވަސިޓީ ހިންގުމަށް އެކަށީގެންވާ އާ އިމާރާތެއް އެޅުމަކީ ރައީސް ޑރ މުހައްމަދު މުއިއްޒުގެ ސަރުކާރުގެ އަމާޒެއް ކަމަށެވެ. އަދި އަދި އެކަމަށްޓަކައި35،000 އަކަފޫޓްގެ ބިމެއް މިހާރު ހުޅުމާލެއިން ހަމަޖެހިފައިވާ ކަމަށް އައިޔޫއެމްގެ ކުރީގެ ޗާންސެލަަރު ވިދާޅުވި އެވެ.
ޝަހީމު ވިދާޅުވީ ރާއްޖެ އިން ބޭރުގެ ދަރިވަރުން ވެސް ތައުލީމު ހާސިލުކުރަން އައިޔޫއެމަށް ގެނައުމަކީ އެ ޔުނިވާސިޓީގެ ވަރަށް ބޮޑު އަމާޒެއް ކަމަށެވެ. އަދި އެ ޔުނިވާސިޓީ އަށް އޮތީ ވަރަށް އުޖާލާ މުސްތަޤްބަލެއް ކަމަށް ވިދާޅުވި އެވެ.
"އެންމެ އުއްމީދު ކުރާ ދުވަހަކީ އައިޔޫއެމަކީ ބައިނަލްއަޤްވާމީ ގޮތުން ފާހަގަކޮށްލެވޭ އިސްލާމިކް ޔުނިވާސިޓީއަކަށް ވެގެންދާ ދުވަސް." މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އައިޔޫއެމް ކުރިއެރުވުމަށް މިނިސްޓްރީން ދޭން ޖެހޭ އެންމެ ފުރިހަމަ އެއްބާރުލުން އަބަދުވެސް ލިބޭނެ ކަމަށެވެ.
"ރާއްޖޭގައި އިސްލާމީ ހިދާޔަތު ދަމަހައްޓަން އިސްލާމީ ޔުނިވާސިޓީއަކީ މުހިއްމު މުއައްސަސާއެއް." ޝަހީމު ވިދާޅުވި އެވެ.
އައިޔޫއެމް ހިންގަމުން އަންނަނީ މާލޭގަ އެވެ.