މާލެ ސަރަހައްދުގައި ހިންގަމުން އަންނަ ޕެޓް ޝޮޕްތަކުގެ އިންސްޕެކްޝަނެއް ފަށައިފި އެވެ.
ދިރޭތަކެއްޗާ ބެހޭ މިނިސްޓްރީން އިއްޔެ ފެށި އިންސްޕެކްޝަންގައި މާލެ، ހުޅުމާލެ އަދި ވިލިމާލޭގައި ހިންގަމުންދާ ޕެޓް ޝޮޕްތަކުގެ އިންސްޕެކްޝަން ހަދާނެ އެވެ.
މިކަމާ ގުޅޭ ގޮތުން އެ މިނިސްޓްރީން ބުނީ ޕެޓް ޝޮޕްތަކުުގެ އިންސްޕެކްޝަނެއް ކުރިިއަށް ގެންދާކަން އެ ވިޔަފާރި ހިންގަމުން އަންނަ ފަރާތްތަކަށް ގުޅައި އަންގައި، އެ ތަންތަނަށް ޒިޔާރަތްކޮށް، އިންސްޕެކްޝަން ކުރިއަށް ދާނެ ކަމަށެވެ. އަދި މިކަން ކުރިއަށް ގެންދަނީ ވިޔަފާރިކުރާ ފަރާތްތަކަށް ފަސޭހަވާނެ ގަޑިތަކެއްގައި ކަމަށް ވެސް މިނިސްޓްރީން ބުންޏެވެ.
އިންސްޕެކްޝަނަށް ދާނީ މިނިސްޓްރީގެ ޓެކްނިކަލް ބޭފުޅުން ތަމްރީނު ދީފައިވާ މުވައްޒަފުންނެވެ.
މިނިސްޓްރީން ބުނީ މިއީ ޕެޓް ޝޮޕްތަކުގައި ރަނގަޅު ކުރަން ޖެހޭ ކަންކަން ދެނެގަތުމަށް ކުރިއަށް ގެންދާ އިންސްޕެކްޝަނެއް ކަމަށެވެ.
ތަފާތު ވައްތަރުގެ ދޫންޏާއި ބުޅާ ފަދަ އެއްޗެހީގެ ވިޔަފާރި އަކީ ރާއްޖޭގައޮ މިހާރު ވަރަށް ބޮޑަށް އިތުރުވަމުން އަންނަ ވިޔަފާރިއެކެވެ. މާލެ ސަރަހައްދުގެ އިތުރުން އަތޮޅުތެރޭގެ ބައެއް ރަށްރަށުގައި ވެސް ޕެޓް ޝޮޕްތައް ހިންގަ އެވެ.