ޗައިނާ ސަރުކާރުގެ ހިލޭ އެހީގައި ކ. ހިންމަފުށީގެ މަގުތަކުގައި ސޯލާ ބައްތި ޖެހުމަށް ހިންގި މި މަޝްރޫޢުގެ ދަށުން 165 ބައްތި ޖަހައިފި އެވެ.
އެ ބައްތިތައް ދިއްލުމުގެ ރަސްމިއްޔާތު އިއްޔެ ޝަރަފުވެރިކޮށް ދެއްވީ ލޯކަލް ގަވަނަންސް މިނިސްޓަރު އާދަމް ޝަރީފެވެ. އޭނަ ވިދާޅުވީ ވިދާޅުވީ އެ ބައްތީގެ ސަބަބުން ރައްޔިތުންގެ ރައްކާތެރިކަން އިތުރުވުމާއެކު، ކާބަން ފުޑް ޕްރިންޓް ކުޑަ ކުރެވިގެންދާނެ ކަމަށެވެ. އަދި ޗައިނާގެ މި އެހީ އަކީ ވަރަށް ބޭނުންތެރި އެހީއެއްކަން ފާހަގަކުރައްވައި، އެ ގައުމުން ރާއްޖެ އަށް އެކި ދާއިރާތަކުން އެހީތެރިކަން ފޯރުކޮށް ދެމުން އަންނަ ކަމަށް މިނިސްޓަރު ވިދާޅުވި އެވެ.
ހިންމަފުށީގެ ސޯލާ ބައްތި ދިއްލުން އިފުތިތާހު ކުރަން ބޭއްވި ރަސްމިއްޔާތުގައި ޗައިނާއިން ރާއްޖެ އަށް ކަނޑައަޅައިފައި ހުންނާ ސަފީރު ވަން ލީޒިން ވެސް ބައިވެރިވެވަޑައިގެންނެވި އެވެ.