ކަސްޓަމްސްގެ ޤާނޫނާ ހިލާފަށް ރާއްޖެއަށް ސިއްރުން އެތެރެކޮށްފައިވާ 22 ވެހިކަލާއި ސްޕެއަރ ޕާޓްސް ދައުލަތަށް ނަގުމަށް ހުކުމް ކޮށްފިއެވެ.
މޯލްޑިވްސް ކަސްޓަމްސް ސާވިސްގެ ފަރާތުން ސިވިލް ކޯޓަށް 29 ފެބްރުއަރީ 2024 ގައި ހުށަހެޅުމުން ބެލި މި މައްސަލައިގައި އެ ކޯޓުން ހުކުމް ކޮށްފައިވަނީ 9 ޖުލައި 2024 ގައެވެ.
ސިވިލް ކޯޓަށް ކަސްޓަމްސްއިން ހުށަހެޅި ދައުވާގައި ބުނެފައިވަނީ، ގދ. ތިނަދޫ، އަސްބާހް ނިޒާމުގެ ނަމުގައި އަމިއްލަ ފަރުދުންގެ ވިޔަފާރީގެ ގޮތުގައި ރަޖިސްޓްރީ ކޮށްފައިވާ މެޓްރޮކްސްގެ ނަމުގައި ޕްލައިވުޑް އަދި ޓިމްބަރގެ ގޮތުގައި 22 އޮގަސްޓް 2019 ގައި ޑިކްލެއަރކޮށް، ކްލިއަރކޮށްގެން، އެމްޕީއެލް ސަރަހައްދުން ނެރުނު 2 ކޮންޓެއިނަރެއްގައި، ގާނޫނާއި ގަވައިދާ ހިލާފަށް ވެހިކަލްތަކެއް ނެރެފައިވާކަމަށް ތުހުމަތު ކުރެވި އެ މައްސަލަ ތަހުގީގު ކުރެވިފައިވާ ކަމަށެވެ. އަދި އެކަން ކަސްޓަމްސްގެ ތަހުގީގަށް ސާބިތުވެފައިވާކަމަށާއި އެހެންކަމުން އެ އެމުދާތައް ދައުލަތަށް ނެގުމަށްޓަކައި ކޯޓު އަމުރަކަށް ސިވިލް ކޯޓުގައި އެދިފައިވެއެވެ.
މި މައްސަލައިގައި ދައުވާލިބޭ ފަރާތުން ވަނީ، މެޓްރޮކްސްގެ ނަމުގައި މި މުދާ އެތެރެކޮށްފައިވާ ކަމަށް ދައުލަތުން ބުނި ނަމަވެސް އެ މުދަލަކީ މެޓްރޮކްސްގެ މުދާ ނޫންކަމަށް ބުނެފައެވެ. އެހެންނަމަވެސް މިއީ މީނާއާ ގުޅުމެއްވާ އެއްޗެއް ނޫންކަން ބަޔާންކޮށްދޭ އެއްވެސް ހެއްކެއް ޝަރީއަތަށް ހުށަހަޅާފައި ނުވާކަން ފާހަގަ ކޮށްފައިވެއެވެ.
މި މައްސަލައިގައި ސިވިލް ކޯޓުން އިއްޔެ ކުރި ހުކުމުގައި ބުނެފައިވަނީ، ޕްލައިވުޑް އަދި ޓިމްބަރގެ ގޮތުގައި ޑީކްލިއާކޮށް ސިއްރުން އެތެރެކޮށްފައިވާ 22 ވެހިކަލާއި ސްޕެއަރ ޕާޓްސްއަކީ ކަސްޓަމްސްއަށް ލިބިދޭ ބާރުގެ ދަށުން ހިފަހައްޓާފައިވާ މުދާ ކަމަށެވެ. މި ވެހިކަލްތަކަކީ ދައުވާލިބޭ ފަރާތާ ގުޅުމެއް ހުރި ވެހިކަލްތަކެއް ނޫންކަމުގައި ބުނިނަމަވެސް، މި މުދާ އެތެރެކޮށްފައިވަނީ، ދެވޭ ޔޫސާރ ނޭމާއި ޕާސްވޯޑް ބޭނުންކޮށްގެންކަން އެނގޭ ކަމަށެވެ. އަދި މި ލޮގިން ބޭނުންކުރީ ދައުވާލިބޭ ފަރާތުން ނޫންކަަން ސާބިތުކޮށްދެވިފައި ނުވާ ކަމަށެވެ. އެހެންކަމުން މި 22 ވެހިކަލާއި ސްޕެއަރ ޕާޓްސްގެ މައްޗަށް ހިމެނޭ މި މުދަަލަކީ ދައުލަތަށް ނެގުމުގެ އަމުރު ދެވިފައއިވާ މުދާކަމަށް ހުކުމް ކޮށްފައިވެއެވެ.