މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްޓީޑީސީ) ގެ އަހަރީ އާންމު ޖަލްސާ މި މަހުގެ 21 ގައި ބާއްވަން ނިންމައިިފިއެވެ.
އެ ކުންފުނުން ބުނީ ހުރިހާ ހިއްސާދާރުންނަށް ހުޅުވާލައިގެން ބާއްވާ ޖަލްސާ އޮންނާނީ 21 ވަނަ ދުވަހުގެ ރޭ 9:00 ގައި މެންހެޓަން ބިޒްނަސް ހޮޓެލްގައި ކަމަށެވެ.
އަހަރީ އާންމު ޖަލްސާގައި 2022 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ފާސްކުރުމާއި 2023 މިދިޔަ އަހަރު ބޭއްވި އެކްސްޓްރާ އޯޑިނަރީ ޖަލްސާގެ ޔައުމިއްޔާ ފާސްކުރުމާއި އެ އަހަރުގެ ޑިރެކްޓަރުންގެ ރިޕޯޓާއި އޮޑިޓް ކުރެވިފައިވާ މާލީ ހިސާބުތަކުގެ ރިޕޯޓް ފާސްކުރުމުގެ އިތުރުން މި އަހަރށް ކުންފުނީގެ އެކްސްޓާނަލް އޮޑިޓަރުން އައްޔަންކުރުމާއި އުޖޫރަ ކަނޑައެޅުން އޮންނާނެ އެވެ.
މީގެ އިތުރުން ހިއްސާދާރުންނަށް ބަހާނެ ފައިދާއާ ގުޅޭ ގޮތުން ޑިރެކްޓަރުންގެ ބޯޑުން ހުށަހަޅުއްވާފައިވާ ހުށަހެޅުމާ މެދު ވެސް ޖަލްސާގައި ގޮތެއް ނިންމާނެ އެވެ. އަދި ޖަލްސާގައި ކުރިއަށް އޮތް ދެ އަހަރަށް ކުންފުނީގެ ބޯޑަށް ޑިރެކްޓަރުން ވެސް އައްޔަން ކުރުން އޮންނާނެ އެވެ.
އެމްޓީޑީސީން ބުނީ ޖަލްސާގައި ބައިވެރިވެވޭނީ މި މަހުގެ 17 ވަނަ ދުވަހުގެ 12:00 އާ ހަމަށް އެކުންފުނީގެ ހިއްސާދާރުންގެ ރަޖިސްޓްރީގައި ހިމެނިފައިވާ މީހުންނަށް ކަމަށެވެ. ޕްރީ-ރަޖިސްޓްރީ ކުރުމުގެ ސުންގަޑިއަކީ މި މަހުގެ 19 ވަނަ ދުވަހުގެ ރޭ 9:00 އެވެ.
ޖަލްސާއަށް ހާޒިރުވެގެން ބައިވެރިވާ ހިއްސާދާރުން ޕްރ-ީރަޖިސްޓްރީ ކުރުމުގެ ބަދަލުގައި ޖަލްސާ އޮންނަ ރޭ 7:30 އިން ފެށިގެން 8:45 އާ ހަމައަށް ޖަލްސާކުރާ މާލަމުގައި ހުންނަ ރަޖިސްޓްރޭޝަން ކައުންޓަރ މެދުވެރިކޮށް ޖަލްސާއަށް ރަޖިސްޓްރީ ކުރުމުގެ ފުރުސަތު އޮންނާނެ އެވެ.
ހިއްސާދާރުގެ ބަދަލުގައި ޖަލްސާގައި ބައިވެރިވުމަށް ޕްރޮކްސީ އައްޔަން ކުރެވޭނީ ކުންފުނީގެ ޝެއާ ޕޯޓަލް އާއި އެމްއެސްޑީގެ އޮންލައިން ސިސްޓަމް "އިންފިނިޓީ" މެދުވެރިކޮށް އެކަންޏެވެ. ޖަލްސާގައި ބައިވެރިވުމަށް ހިއްސާދާރުން ވެސް ޕޯޓަލް މެދުވެރިކޮށް ރަޖިސްޓްވާން ޖެހެ އެވެ.
އެމްޓީޑީސީ އަކީ ސަރުކާރުން 2006 ގައި އުފެއްދި ކުންފުންޏެކެވެ.