އިއްޔެ ބޭއްވި މުޒާހަރާ އަކީ ހަމަގައިމުވެސް ރާއްޖޭގެ ތާރީޚްގައި ބޭއްވި އެންމެ ބޮޑު މުޒާހަރާ ކަން މާލޭގެ މަގުތަކުން އެމަންޒަރު ފެނިގެންދިޔަ ކޮންމެ މީހަކުވެސް ހެކިވާނެއެވެ. މަޖީދީމަގުގެ އެއްކޮޅުން އަނެއްކޮޅަށް އޮތީ ފުރި ބާރުވެފައެވެ. ހުރިހާ އެންމެން ވެސް ބާރަށް ގޮވަމުން ދިޔައީ ސަރުކާރުން ރައްޔިތުންގެ މައްޗަށް އަނިޔާވެރި ނުވުމަށެވެ.
އަޅުގަނޑަކީ މިއިން ދުވަހަކުވެސް މުޒާހަރާތަކަށް ގޮސް އުޅުނު މީހެއް ނޫނެވެ. ނަމަވެސް މުޒާހަރާ ތަކާ ސިޔާސީ އެއްވުންތަކުގައި ވާނުވާ ބެލުމަށް ވަރަށް ގިނަ ފަހަރު ދެވޭ މީހެކެވެ. ސަބަބަކީ އެކި ނޫސްތަކުން އެކި ގޮތްގޮތަށް ޚަބަރު ގެނެސްދޭތީއެވެ. ބޭނުންވަނީ އަމިއްލަ ލޮލުން ބަލައިގެން ކަމުގެ ޙަޤީޤަތް ހޯދުމެވެ.
"މޭޑޭ"ގެ މުޒާހަރާގެ ކަންތައް ބެލުމަށްޓަކައި އަޅުގަނޑު ގޮސް ހުއްޓިލީ މަޖީދީމަގުގައެވެ. ފެންނަމުން ދިޔައީ މުސްކުޅި އުމުރުގެ މީހުންނާއި އަޅުގަނޑު ފަދަ ޒުވާނުންނެވެ. އެމީހުންގެ ފަރާތުން ފެނިގެން ދިޔަ ޖޯޝާއި ފޯރިން އަޅުގަނޑުގެ ލޭވެސް ކެކިގެން ދިޔައެވެ.މަންޒަރު ބަލަން ނުހުރެ އަޅުގަނޑުވެސް ގަސްތުކުރީ މުޒާހަރާ އާއި ބައިވެރި ވުމަށެވެ.
އޭރު ފުލުހުންގެ ފަރާތުން ފެންނަމުން ދިޔައީ ރައްޔިތުންނަށް އެއްބާރުލުން ދެމުން ދިޔަ މަންޒަރުތަކެވެ. މަޖީދީމަގަށް އެއްވެސް ވެހިކަލަކަށް ނުވެދެވޭގޮތް ހަދައި މުޒާހަރާގެ ބައިވެރިންނަށް އެހީވަމުން ދިޔަ މަންޒަރު އަޅުގަނޑަށް ފެނުނެވެ.
ދަންނަވަންތޯ އެވެ. މިދިވެހިރާއްޖޭގެ ބައެއް ޓީވީ ޗެނަލްތަކުން 'މަދު ބަޔަކު' ކުރަމުން ދިޔަ މުޒާހަރާއެކޭ ބުންޏަސް އެއީ ކަނޑައެޅިގެން ދޮގެކެވެ. އަޅުގަނޑު 23 ޑިސެމްބަރ މުޒާހަރާވެސް ބެލީމެވެ. އަޅުގަނޑުގެ އަމިއްލަ ދެ ލޮލުންނެވެ. "މޭޑޭ" ގެ މުޒާހަރާގައި އެދުވަހަށް ވުރެ މާގިނަ އަދަދަކަށް މީހުން ތިއްބެވެ.
މުޒާހަރާގެ އިސްސަފުގައި ތިއްބެވި ބޭފުޅުން ގޮސް ސޯޝަލް ސެންޓަރ ހިސާބުގައި މަޑުކޮށް ވާހަކަ ދައްކަން ފެށިއެވެ. އޭރު އަދި އާޓިފިޝަލް ބީޗާ ހިސާބުގައި މުޒާހަރާގެ ބައެއް ބައިވެރިން ތިއްބެވެ. އެބޭފުޅުންގެ ވާހަކަތަކަށް ފަހު ދުޢާ އެއް ކުރެވުނެވެ. ބައެއް މީހުންނަށް އެ ދުޢާ ވެގެން ދިޔައީ ޖޯކަކަށެވެ.
ނަމަވެސް ޝެއިޚް އިމްރާން ދުޢާ ކުރެއްވި ގަޑިއަކީ އިރުއޮއްސެމުން ދިޔަ ގަޑިއެވެ. އެއީ ދުޢާ އިޖާބަކުރައްވަވާ ގަޑިއެއްކަން ފަހަރުގައި މަލާމާތްކުރި ނޭނގުނީ ކަމަށް ވެދާނެއެވެ.
ދުޢާ އަށް ފަހު މުޒާހަރާގެ ބައިވެރިންނަށް އެންގީ އިސްލާމީ މަރުކަޒަށް ނަމާދަށް ދިއުމަށެވެ. މުޒާހަރާގެ ބައިވެރިން ބާރަށް ހިނގާފައި ދިޔައީ އިސްލާމީ މަރުކަޒާ ހިސާބަށް ދިއުމަށެވެ. އަޅުގަނޑު ހުރީ މުޒާހަރާގެ އެންމެ އިސްސަފުގައި ތިބި 50 މީހުންގެ ތެރޭގައެވެ. ފަޚުރުވެރިވި ކަމެއް ދަންނަވާލާނަމެވެ.އޭރު މުޒާހަރާގެ އިސްސަފުގައި ތިބީ އަޅުގަނޑު ނިސްބަތްވާ އައްޑޫގެ ހިތްވަރުގަދަ ޒުވާނުންނެވެ.
ފުލުހުން އެބުނާ ފަދަ ނުކުޔަމަންތެރިކަމެއް ނުދައްކައި އެމީހުން ގޮސް އެދުނީ ނަމާދަށް ދެވޭނެ ގޮތް ހެދުމަށެވެ. އެހެން ނަމަވެސް 'ދަގަނޑު' ޔުނީފޯމް އަޅައިގެން ތިބި ފުލުހުންގެ ފަރާތުން ފެނުނީ ރުޅިވެރިކަމާއި އަނިޔާވެރިކަމެވެ.
"އާދޭސްކޮށްފައި ބުނަން އަހަރުމެން ނަމާދަށް ފޮނުވައި ދީ. " މިއީ އަޅުގަނޑާއި ޖެހިގެން ހުރި މެދު އުމުރުގެ ފިރިހެނަކު ފުލުހުން ގާތު ބުނި ޖުމްލައެވެ.
އެބޭފުޅުން ރައްދު ދެއްވި ގޮތް ދެއްތޯއެވެ. ބިންމަތީގައި ޝީލްޑް ޖެހުމަށް ފަހު އާންމު ރައްޔިތުންނާއި ދިމާއަށް ދުއްވައިގަތީ އެވެ. އެހެން މުޒާހަރާތަކުގައި ފެންނަނީ ފުުލުހުން މުގުރު ބޭނުންކޮށްގެން މީހުންނަށް އަނިޔާކުރި މަންޒަރެވެ. ނަމަވެސް އިއްޔެގެ މުޒާހަރާގެ ބައިވެރިންގެ ގައިގައި ޝީލްޑްތަކުން ތަޅަމުންދިޔަ މަންޒަރު އަޅުގަނޑަށް ފެނުނެވެ.
އެއީ ބިރުވެރި ވަގުތުކޮޅެކެވެ. ހިތާމައިން ފުރިގެންވި ވަގުތެކެވެ. ފެންނަމުން ދިޔައީ މި ލޮބުވެތި ވަތަނާއި ރައްޔިތުން ހިމާޔަތް ކުރުމަށް ހުވާކޮށްގެން ތިބި ފުލުހުންތަކެއް އައިސް އަނިޔާކުރުމުން ހަމަ ދިވެހި ރައްޔިތުންގެ ގައިން ލޭ އޮހޮރިގެން ދިޔަ މަންޒަރެވެ.
ބައެއް މީހުން އެބަ ބުނެއެވެ." ގޭގައި ތިބި ނަމަ ތިހެން ނުވާނެ އޭ ކީއްކުރަން ހޭ އެތަނަށް ދިޔައީ "
އެފަދަ މީހުންނަށް އަޅުގަނޑު ބުނެލަން އޮތީ އެމީހުން އެތަނަށް ދިޔައީ ރާއްޖޭގެ ރައްޔިތުންގެ ތެރެއިން ބަޔަކަށް ލިބެމުންދާ އަނިޔާތަކަށް ނިމުމެއް ގެނައުމަށެވެ. ތިބޭފުޅުންގެ އާއިލާގެ މީހަކަށް ނުވަތަ ރައްޓެއްސަކަށް އަނިޔާއެއް ވުމުން އިއްޔެ މުޒާހަރާއަށް ނިކުތް މީހުންގެ އިހްސާސްތައް ތިބޭފުޅުންނަށް ވެސް އެނގިގެންދާނެއެވެ.
އަޅުގަނޑު އެއްވެސް ހާލެއްގައި މުޒާހަރާގެ ބައިވެރިން ފުލުހުންނަށް ހަމަލާދިނުން ދިފާޢު ނުކުރާނަމެވެ. ނަމަވެސް އިއްޔެގެ މުޒާހަރާގައި އިސްވެ ކުރިމަތިލާން ފެށީ ފުލުހުންނެވެ.
މުޒާހަރާ ނިމިއްޖެއެވެ. އަނިޔާވެރިކަމުގައި އިތުރު ދުވަހަކަށް އުޅެން ނިކަމެތި ރައްޔިތުންނަށް މިއޮތީ އަނެއްކާވެސް ޖެހިފައެވެ. ސަރުކާރުން އެވަނީ ޝެއިޚް އިމްރާން، އަލީ ވަޙީދު އަދި އަމީން ވެސް ހައްޔަރުކޮށްގެން ގެންގޮސްފައެވެ.
ނަމަވެސް ދަންނަވަންތޯ އެވެ. މިހާރު ކޮންމެ ރައްޔިތަކީ ރައީސް ނަޝީދެކެވެ. އިމްރާނެކެވެ. ނުވަތަ އަލީ ވަޙީދެކެވެ.
ދިވެހިރައްޔިތުން އަބަދުވެސް ﷲ ގެ ހަޟްރަތުގައި ދުޢާ ދަންނަވަމުން ގެންދަވާށެވެ. އިރާދަކުރެއްވިއްޔާ މި އަނިޔާވެރިކަމަށް ވަރަށް އަވަހަށް ނިމުމެއް އަންނާނެއެވެ.