ކަނޑުގެ ވަސީލަތްތައް ހިމާޔަތްކުރުމަށްޓަކައި ހާއްސަ ގާނޫނެއް އެކުލަވާލުމަށް އދ. ގެ ފުޑް އެންޑް އެގްރިކަލްޗާ އޮގަނައިޒޭޝަން (އެފްއޭއޯ) ގެ ޤާނޫނީ ލަފައަކަށް ފިޝަރީޒް މިނިސްޓަރު އަހުމަދު ޝިޔާމް އެދިވަޑައިގެންފި އެވެ.
މިނިސްޓަރު އެކަމަށް އެދިވަޑައިގެންނެވީ އެފްއޭއޯގެ ކޮމެޓީ އޮން ފިޝަރީޒްގެ ބައްދަލުވުމުގައި ބައިވެރިވެވަޑައިގަތުމަށް އިޓަލީ އަށް ކުރައްވަމުން ގެންދަވާ ދަތުރުގައި އެފްއޭއޯގެ އެސިސްޓެންޓް ޑިރެކްޓަ ޖެނެރަލް މެނުއެލް ބަރަންޖާ އެކީ ބޭއްވި ބައްދަލުވުމުގަ އެވެ.
އެ ބައްދަލުވުމުގައި މީގެ 40 އަހަރު ކުރިން އެފްއޭއޯގެ އެހީއާ އެކީ ރާއްޖޭގައި ތަރައްގީކުރި ފިޝް އެގްރިގޭޓިން ޑިވައިސްތަކުގެ ބޭނުންކުރެވޭ މުއްދަތު އިތުރުކުރުމަށް ކުރެވޭ މަސައްކަތްތަކަށް ވެސް އަލިއަޅުވާލެއްވިއެވެ. އަދި މި އަހަރުގެ ތެރޭ މެރިކަލްޗަ ދާއިރާގެ ބޮޑު މަޝްރޫޢެއް ކުރިއަށް ގެންދަން ރާވާފައިވާތީ އެ ދައިރާއިން ގުޅިގެން މަސައްކަތް ކުރުމަށް ވެސް މަޝްވަރާކޮށްފައިވެ އެވެ.
Minister @Shiyamaldives met with @FAO Assistant Director-General @Manu_FAO to discuss potential collaboration programs. The FAO played a crucial role in designing the first anchored fish aggregating devices (AFADs) 40 years ago. The minister noted ongoing work with the FAO to… pic.twitter.com/MwpWjF3hTm
— Ministry of Fisheries and Ocean Resources (@MFORmv) July 9, 2024
މިނިސްޓަރު ޝިޔާމު ވިދާޅުވީ ކަނޑުގެ ވަސީލަތްތައް ހިމާޔަތްކޮށް ބޭނުން ކުރުމުގެ ޤާނޫނެއް އެކުލަވާލުމަށް އެފްއޭއޯގެ ގާނޫނީ ލަފާ މުހިއްމު ކަމަށާއި އިންޑިއަން އޯޝަން ޓޫނާ ކޮމިޝަންގައި އެފްއޭއޯ އިން އަދާކުރާ ދައުރަކީ ވަރަށް މުހިއްމު ދައުރެއް ކަމަށެވެ. އެގޮތުން ހިޖުރަކުރާ ކަނޑުގެ ވަސީލަތްތައް މެނޭޖް ކުރުމަށް ގުޅިގެން މަސައްކަތް ކުރުމަށް ވެސް މިނިސްޓަރު އެދިވަޑައިގެންފައެވެ.
އެ ބައްދަލުވުމުގައި، އެފްއޭއޯ އިން ވަނީ ރާއްޖޭއިން އިންޑިއާ ކަނޑުގެ މަސްވެރިކަމުގައި އަދާކުރާ ދައުރު ފާހަގަކޮށް ދެ ފަރާތް ގުޅިގެން މަސައްކަތް ކުރަން ޝައުޤުވެރިކަން ފާޅުކޮށްފަ އެވެ. އަދި ގްލޯބަލް އެންވައިރަންމަންޓަލް ފެސިލިޓީ މެދުވެރިކޮށް ބަޔޯޑައިވަސިޓީ ބިއޯންޑް ނޭޝަނަލް ޖުރިސްޑިކްޝަން ތަންފީޒު ކުރުމަށް ފަންނީ އެހީ ދިނުމަށް ތައްޔާރަށް އޮތް ކަމަށް އެ ޖަމާއަތުން ބުނެފައިވެ އެވެ.
މި މަހުގެ 7-13 އަށް މިނިސްޓަރު ޝިޔާމް އިޓަލީ އަށް ކުރައްވަމުން ގެންދަވާ މިދަތުރަކީ އެފްއޭއޯގެ ކޮމިޓީ އޮން ފިޝަރީޒްގެ 36 ވަނަ ސެޝަންގައި ބައިވެރިވެވަޑައިގަތުމަށް ކުރައްވާ ދަތުރެކެވެ.