ސައިކަލެއް ވަގަށް ނެގި މީހަކަށް 2 އަހަރުގެ ޖަލު ހުކުމެއް އިއްވައިފިއެވެ.
ސައިލަލެއް ވަގަށްނެގި މައްސަލައިގައި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާ އުފުލާފައިވަނީ ރ. ކަނދޮޅުދޫ އަހުމަދު އިރުޝާންގެ މައްޗަށެވެ.
އޭނާގެ މައްޗަށް ކްރިމިނަލް ކޯޓުގައި އުފުލި ދައުވާގައި ބުނެފައިވަނީ، 2024 ޖެނުއަރީ 10 ވަނަ ދުވަހުގެ ވަގުތެއްގައި އޯކިޑްމަގު އާރުޑީސީ ކައިރީގައި ޕާކުކޮށްފައިހުރި އެހެންމީހެއްގެ ސައިކަލު ނަގައިގެން ދުއްވާފައިވާކަމަށެވެ. މި ދައުވާއަށް އިރުޝާން ވަނީ އިއުތިރާފުވެފައެވެ.
އެހެންކަމުން އިއްޔެ ކްރިމިނަލް ކޯޓުން ވަނީ އޭނާގެ މައްޗަށް 2 އަހަރުގެ ޖަލު ހުކުމެއް އިއްވާ، އޭގެތެރެއިން އޭނާ ބަންދުގައި ހޭދަކުރި މުއްދަތު އުނިކޮށް ތަންފީޒުކުރަންޖެހޭ އަދަބަކީ 1 އަހަރާއި 11 މަހާއި 14 ދުވަހުގެ ޖަލު ހުކުމެއް ކަމަށް ކަނޑައަޅާފައެވެ.
މި މައްސަލައިގެ އިތުރުން ރާއްޖޭގައި ހުންނަވާ އިނގިރޭސިވިލާތުގެ އޮނަރަރީ ކޮންސުލް ޑރ. ޕޯލް އާރްތާ ވަން ޑްރީޝްގެ ސައިކަލު ވަގަށް ނެގިކަމުގެ ކުށް ސާބިތުވުމުންވެސް އިރުޝާންގެ މައްޗަށްވަނީ 10 މަހާއި 8 ދުވަހަށް ޖަލަށްލުމުގެ ހުކުމެއް އިއްވާފައެވެ. ކްރިމިނަލް ކޯޓުން އިރުޝާންގެ މައްޗަށް މި ހުކުމް އިއްވީ 9 ޖުލައި 2024 ގައެވެ.