ސޯޝަލް މީޑިޔާގައި އަދި ބައެއް އެއްވުންތަކުގައި ޕީޕީއެމް އިން ބޭނުން ކުރާ މަޝްހޫރު 'ޕީޕީއެމް އިންގްލިޝް' ގެ ވާހަކަ އަނެއްކާވެސް ދެކެވެން ފަށައިފިއެވެ.
މިފަހަރު ސ.އިސްމެހެލާ ހެރަ ރިސޯޓަކަށް ހެދުމުގެ ޕްރޮޖެކްޓް އިފްތިތާޙް ކުރުމަށް ބޭއްވި ރަސްމިއްޔާތުގެ ބެހި ލީފްލެޓްތަކުގައި 'ޕީޕީއެމް އިންގްލިޝް' ހުރި ކަމަށް ބުނެއެވެ.
އެ ރޭގެ ރަސްމިއްޔާތުގައި ބެހި ލީފްލެޓްތަކުގައި އެންމެ ފުރަތަމަ އިސްމެހެލާ ހެރައިގެ ނަން ޖަހާފައި އޮންނަނީ 'އިސްމެލާ ހެރަ' (ISMELA HERA) މިހެންނެވެ.މިކަން ފާހަކޮށް ގިނަ ބަޔަކު ދަނީ ސޯޝަލް މީޑިޔާގައި ސަރުކާރަށް ފާޑުކިޔަމުންނެވެ.
އިސްމެހެލާ ހެރަ ޕްރޮޖެކްޓަކީ ސަރުކާރުން ސިޔާސީ މަޤްސަދެއް ޙާސިލްކުރުމަށް ދެއްކި ހުވަފެނެއް ކަމަށް ގިނަ ބަޔަކު ތުހުމަތު ކުރާއިރު މި ޕްރޮޖެކްޓުގެ ލީފްލެޓްތަކުގައި 'ޕީޕީއެމް އިންގްލިޝް' ހުރުމަކީ ސަރުކާރުން އެ ރަށް ތަރައްޤީ ކުރުމަށް ދޭ އަހަންމިއްޔަތު ހާމަވެގެންދާ ކަމެއް ކަމަށް ވެސް ސޯޝަލް މީޑިޔާގައި ގިނަ ބަޔަކު ދަނީ ފާހަގަ ކުރަމުންނެވެ.
އިސްމެހެލާ ހެރަ ޕްރޮޖެކްޓް އިފްތިތާޙްކުރުމަށް ބޭއްވި ރަސްމިއްޔާތުގައި އެ ޕްރޮޖެކްޓާއި ބެހޭ މާގިނަ ތަފްސީލްތަކެއް ސަރުކާރުން ހާމަކޮށްފައެެއް ނުވެއެވެ.