ސަރުކާރުން ދޭ ސްކޮލޮޝިޕަށް ނުވަތަ ލޯނު ހޯދުމަށް އެދިފައިވާ ނުވަތަ ލޯނު ދިނުމަށް ހޮވިފައިވާ ދަރިވަރުންނާ ގުޅައިގެން މަކަރާއި ހީލަތުން ފައިސާ ހޯދަން ސްކޭމް ހިންގާތީ ސަމާލުވުމަށް ހަޔަ އެޑިއުލޭޝަން މިނިސްޓްރީން ބުނެފި އެވެ.
އެ މިނިސްޓްރީން ބުނީ މިހާތަނަށް މަޢުލޫމާތު ލިބިފައިވާ ގޮތުގައި މަކަރާއި ހީލަތުން ފައިސާ ހޯދަން އެދެމުން ދަނީ ވިސާ ހަމަޖެއްސުމާއި ޓިކެޓް ގަތުން ފަދަ ކަންކަމާއި، އެހެނިހެން ބައެއް ކަންކަން ކުރުމަށް ފައިސާ ބޭނުންވާ ކަމަށް ބުނެ ކަމަށެވެ. އަދި ދަރިވަރުންނަށް ފައިސާ ދޫކުރުން އަވަސް ކޮށް ދެވޭނީ ފައިސާ ދިނުމުން ކަމަށް ވެސް ބުނާ މައްސަލަތަކެއް ސަމާލު ކަމަށް އައިސްފައިވާ ކަމަށް މިނިސްޓްރީން ބުންޏެވެ.
ސަރުކާރުން ދޭ ސްކޮލޮޝިޕަކަަށް ވިޔަސް ނުވަތަ ލޯނަކަށް ވިޔަސް ދަރިވަރަކު ހޮވުމަކަށް، އަދި ހޮވިފައިވާ ދަރިވަރެއްގެ އެއްވެސް ކަމަކަށް މިނިސްޓްރީ އަށް، އެއްވެސް ދަރިވަރަކު، އެއްވެސް ކަމަކަށް، ފައިސާއެއް ދައްކާކަށް ނުޖެހޭނެ ކަމަށް މިނިސްޓްރީން ބުންޏެވެ.
ދަރިވަރުންނާއި ގުޅޭ ކަންކަމުގައި މި މިނިސްޓްރީން މުއާމަލާތް ކުރަމުން ދާނީ އެކަމަށް ޚާއްސަކޮށްފައި އޮންނަ އުސޫލުގެ ތެރެއިން ކަމަށާއި ޕޯޓަލް މެދުވެރިކޮށް ނުވަތަ އީމެއިލްގެ ޒަރީއާ އިން ކަމަށް ހަޔަ އެޑިއުކޭޝަނުް ބުންޏެވެ. އެކަމަކު ކޮންމެހެން ގުޅަން ޖެހިގެން ބައެއް ޙާލަތްތަކެއްގައި ފޯނުން ގުޅަން ޖެހިއްޖެނަ މަ ގުޅާނެ ކަމަށް މިނިސްޓްރީން ބުންޏެވެ.
"އެހެންކަމުން، ދަރިވަރެއްގެ އެއްވެސް ކަމަކާ ގުޅޭ ގޮތުން ކޯލެއް ލިބިއްޖެ ހިނދެއްގައި، އެ ގުޅާ ނަންބަރަކީ މިނިސްޓްރީގެ ނަންބަރެއްކަން ޔަޤީންވާ ކަމުގައި ވަނީނަ މަ ނޫނީ ގުޅާ މީހަކީ މިނިސްޓްރީގެ މުވައްޒަފެއްކަން ކަށަވަރުކުރެވިފައިވާ ޙާލަތުގައި މެނުވީ އެއްވެސް ޒާތީ މަޢުލޫމާތެއް ހިއްސާ ނުކުރެއްވުން އެދެން،" މިނިސްޓްރީން ބުންޏެވެ. "އަދި އެއްވެސް ޙާލަތެއްގައި ފައިސާގެ އެއްވެސް މުއާމަލާތެއް ނުކުރެއްވުން އެދެން."