މިރޭ ސިޔާސީ ތިން ޕާޓީއެއްގެ ޖަލްސާތަކެއް މާލޭގައި ބާއްވަން ތައްޔާރުވާން ފަށައިފި އެވެ.
މި ރޭ ޖަލްސާތައް ބާއްވާ ޕާޓީތަކަކީ ސަރުކާރު ހިންގާ ޕީއެންސީ އާއި އެންމެ ބޮޑު އިދިކޮޅު ޕާޓީ އެމްޑީޕީގެ އިތުރުން ކުރީގެ ރައީސް އަބްދުﷲ ޔާމީންގެ ޕީއެންއެފުންނެވެ.
މިރޭ ޕީއެންއެފްގެ "ވަރަށް ފޯރި ގަދަ" ޖަލްސާއެއް ބާއްވައި "ނޫސްވެރިންގެ ސުވާލުތައް ހުސްވަންދެން ޖަވާބު ދޭ" ގޮތަށް ޖަލްސާއެއް އޮންނާނެކަން ބުދަ ދުވަހު އެ ޕާޓީން އިއުލާންކުރުމާ އެކީ، ޕީއެންސީން ހަމަ އެ ދުވަހު "ވަރަށް ފޯރި ގަދަ" ޖަލްސާއެއް މިރޭ އޮންނާނެކަން އިއުލާންކުރި އެވެ.
އެމްޑީޕީގެ ޖަލްސާއެއް މިރޭ އޮންނާނެކަން އިއުލާންކުރީ ރޭގަ އެވެ.
ފާހަގަކޮށްލެވޭ ކަމަކީ މި ތިން ޕާޓީ އަކީ މިހާރު ރާއްޖޭގެ ސިޔާސީ މައިދާނުގައި އެންމެ ހަރަކާތްތެރިކޮށް އުޅޭ ތިން ޕާޓީކަމެވެ. ރިޔާސީ އިންތިހާބާއި މަޖިލިސް އިންތިހާބުގެ ބޮޑު ނާކާމިޔާބީ އަށް ފަހު، އެމްޑީޕީގެ ހަރަކާތްތައް ވަރަށް ބޮޑަށް ހުއްޓިފައި އޮތުމަށް ފަހު، ޕާޓީގެ ހަރަކާތްތައް އަލުން ފެށުނީ މި މަހުގެ ކުރީކޮޅު އެވެ.
ރާއްޖޭގައި މި ވަގުތު ސިޔާސީ ގޮތުން އެންމެ ވަރުގަދަ ޕާޓީ އަކީ ޕީއެންސީ އެވެ. ސަރުކާރު ހިންގާ ޕާޓީގެ އިތުރުން އެއީ މަޖިލީހުގެ ސުޕަ މެޖޯރިޓީ އޮތް ޕާޓީ އެވެ.