އިންޑިއާގެ މަހުޖަނު މުކޭޝް އަމްބާނީގެ ހަގު ދަރިފުޅު އާނަންތު އަމްބާނީގެ ކައިވެނި ހަފުލާ މާދަމާ ބާއްވަން ތައްޔާރުވެއްޖެ އެވެ.
މި އަހަރުގެ ފެބްރުއަރީން ފެށިގެން މި ކައިވެންޏާ ގުޅޭ އެތައް ހަފުލާއެއް އަންނަނީ ވަރަށް ފޯރިގަދަކޮށް ބާއްވަމުންނެވެ. އެގޮތުން އާނަންތު، 29، އާއި އޭނަގެ ބައިވެރިޔާ ރާދިކާ މާޗަންޓް، 29، ގެ "ޕްރީ-ވެޑިން" ގެ ތެރެއިން އަގުބޮޑު އެތައް އިވެންޓެއް މިހާތަނަށް ވަނީ ބާއްވައިިފަ އެވެ. އޭގެ ތެރޭގައި ބޭރުގެ ބޮޑެތި ބިލް ގޭޓްސް އާއި މާކް ޒަކަބާގް ފަދަ ބޮޑެތި މަހުޖަނުންނާއި ސެލެބްރިޓީން ގެނެސްގެން ކައިވެންޏާ ގުޅޭ އިވެންޓްތަކެއް ބާއްވާފައިވެ އެވެ.
އެގޮތުން ބޮޑު އަގު ދީގެން އިވެންޓްތަކުގައި ފަޕޯމްކުރުވި ބޭރުގެ ފަންނާނުންގެ ތެރޭގައި ލަވަކިޔުންތެރިޔާ ރިއާނާ އާއި ޖަސްޓިން ބީބާ ވެސް ހިމެނެ އެވެ.
މީގެ އިތުރުން އަމްބާނީގެ އާއިލާ އިން "މުޅިި ބޮލީވުޑް" ގޮވައިގެން މިދިޔަ މަހުގެ ތެރޭގައި އިޓަލީ އަށް ގޮސް، ކްރޫޒްލައިނާއެއްގައ ވެސް ކައިވެންޏާ ގުޅޭ ހަރަކާތަކެއް ހިންގާފައިވެ އެވެ. އެ ކްރޫޒް ދަތުރުގައި ޕަފޯމްކުރަން އިންޑިއާ އިން ބޭރުގެ އެކި ފަންނާނުންނަށް ފުރުސަތު ދީފައިވެ އެވެ.
އާނަންތު އާއި ރާދިކާގެ ކައިވެނީގެ ރަސްމީ ހަފުލާ މާދަމާ ކުލަގަކޮށް ބާއްވަން އެންމެ ފަހުގެ ތައްތާރީތައްވަމުން އަންނަ އިރު، ގިނަ ބައެއްގެ ފާޑުކިޔުންތައް ވެސް މިކަމަށް އަމާޒުވެފައިވެ އެވެ. އެގޮތުން އިންޑިއާގެ ބައެއް އަންމުންނާއި މީޑިއާތަކާއި އަވައްޓެރި ބައެއް ގައުމުތަކުން ވެސް އަމްބާނީ އާއިލާ އިން އެ މީހުންގެ ތަނަވަސްކަމުގައި ފައިސާ ތަޅައި ބުރުއްސާ ކަމަށް ބުނެ ފާޑު ކިޔާފައިވެ އެވެ.
ބައެއް މީހުން އާނަންތުގެ ކައިވެނީގެ "މަޖާގަނޑު" ސިފަކޮށްފައި ވަނީ "ބޮޑު ޗަރުކޭހެއް" ގެ ގޮތުގަ އެވެ. އަދި މިއީ ނިމުމެއް އަންނަން އުޅޭ ކަމެއް ނޫން ކަމަށް ބުނެ ވެސް އެތައް ބައެެއްގެ މަލާމާތް އަމާޒުވެފައިވެ އެވެ.
ކައިވެނީގެ ހަފުލާ ބާއްވަން ހަމަޖެހިފައި ވަނީ މުމްބާއީގެ ޖިއޯ ވޯލްޑް ކޮންވެންޝަން ސެންޓަރުގަ އެވެ. އެތަނަކީ އަމްބާނީގެ އާއިލާ އިން ބިނާކޮށް 2022 ގައި ހުޅުވި ތަނެކެވެ. މީޑިއާތަކުން ބުނީ އެންމެ މަތީ ފެންވަރުގައި މާދަމާ ބާއްވާ ކައިވެނީގެ ހަފުލާގައި ބޭރުގެ ނުފޫޒު ގަދަ 100 އަށް ވުރެ ޝަހުސިއްޔަތުން ވެސް ބައިވެރިވާނެ ކަމަށެވެ. އޭގެ ތެރޭގެ އެމެރިކާގެ ބައެއް ސެލެބްރިޓިން ވެސް ހިމެނެ އެވެ. އަދި މުޅި ބޮލީވުޑް ހަފުލާގައި ބައިވެރިވާނެ އެވެ.
މާދަމާ ކައިވެނީގެ ރަސްމީ ހަފުލާ ބޭއްވުމަށް ފަހު، އިންޑިއާގެ މި "ބޮޑު ކައިވެނީ" ގެ ކަންކަން ނިމުމަކަށް އަންނާނީ މި މަހުގެ 15 ގަ އެވެ.
އާނަންތު އަކީ މުކޭޝް އާއި ނީތާ އަމްބާނީގެ ތިން ކުދިންގެ ތެރެއިން ހަގު ކުއްޖާ އެވެ. އަނެއް ދެ ކުދިންނަކީ އެއްމާބަނޑު ދެބެއިން ކަމަށްވާ 32 އަހަރުގެ އާކާޝް އަމްބާނީ އާއި އީޝާ އަމްބާނީ އެވެ. އެ މީހުން ކައިވެނިކޮށް ދަރިން ވެސް ލިބިފައިވެ އެވެ.
މުކޭޝްގެ މިލްކިއްޔާތު 116 ބިލިއަން ޑޮލަރަށް އަރަ އެވެ.