ރާއްޖޭގައި މަރުގެ އަދަބު އުވާނުލެވޭނެ ކަމަށް ހޯމް މިނިސްޓަރު އަލީ އިހުސާން، އދ. ގެ ހިއުމަން ރައިޓްސް ކައުންސިލްގައި ވިދާޅުވެއްޖެ އެވެ.
ރާއްޖޭގައި މަދަނީ އަދި ސިޔާސީ ހައްގުތައް ހިމާޔަތްކުރުމަށް ކުރާ މަސައްކަތްތަކާ ބެހޭ ރިޕޯޓު އދއަށް އިއްވުމަށް ޖެނީވާގައި އޮތް ސެޝަނުގައި ރިވީއު ކޮމިޓީގެ މެންބަރަކު ކުރެއްވި ސުވާލަކަށް ޖަވާބުދެއްވަމުން އިހުސާނު ވިދާޅުވެފައިވަނީ ރާއްޖޭގެ ގާނޫނުއަސާސީގެ ބިންގަލަކީ އިސްލާމްދީން ކަމަށާއި ރާއްޖޭގައި މަރުގެ އަދަބު ކަނޑައަޅަނީ ދިވެހި ޖިނާއީ ގާނޫނުގައި ބަޔާންކުރާ އެންމެ ބޮޑެތި ކުށްތަކަށް އެކަނި ކަމަށެވެ.
ރާއްޖޭގެ ގާނޫނުތަކުގައިވާ ގޮތުން މީހަކަށް މަރުގެ ހުކުމް އިއްވޭނީ ވެސް ވަރަށް މަދު ހާލަތެއްގައި ކަމަށާއި މިއީ ރައްޔިތުން ބޭނުންވާ ގޮތަށް ހެދިފައި ހުރި ގާނޫނުތަކެއް ކަމަށްވެސް ވިދާޅުވި އެވެ.
"މަރުގެ އަދަބު ދިނުން އުވާލުމަކީ ގާނޫނުއަސާސީއާ ހިލާފު ކަމެއް،" އިހުސާން ވިދާޅުވި އެވެ.
މީގެއިތުރުން މަރުގެ ހުކުމް ތަންފީޒު ކުރަންޖެހޭ ހާލަތެއްގައި އެ ހުކުމް ތަންފީޒު ކުރާނީ އެއްވެސް ޝައްކެއް ނެތް މިންވަރަށް ކުށް ސާބިތުވުމުން ކަމަށްވެސް އިހުސާން ވިދާޅުވި އެވެ.
ރާއްޖޭގައި އެންމެ ފަހުން މަރުގެ އަދަބު ތަންފީޒު ކޮށްފައިވަނީ 1954 ވަނަ އަހަރު އެވެ.