ޖަމިއްޔާއެއްގެ އެކައުންޓުން އޮޅުވާލައިގެން 500،000 ރުފިޔާ ފޭރިގަނެފައިވާ މައްސަލައެއްގައި މީހަކު ހައްޔަރު ކޮށްފިއެވެ.
ފުލުހުން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ބުނެފައިވަނީ ފެބްރުއަރީ 12 ވަނަ ދުވަހު އާންމު ފަރުދަކަށް ނުދަންނަ ނަންބަރަކުން ގުޅާ، ފްލެޓް ލިބިފައިވާކަމަށް ބުނެ އޮޅުވާލައިގެން އީމެެއިލް ހޯދުމަށްފަހު އެމީހާގެ އަމިއްލަ އެކައުންޓުން 25،000 ރުފިޔާ އަދި އޭނާގެ ގުޅުން އޮންނަ ޖަމިއްޔާއެއްގެ އެކައުންޓުން 562،000 ރުފިޔާ ނަގާފައިވާ ކަމަށެވެ.
މި ސްކޭމްގައި ޖުމުލަ 587،149 ރުފިޔާ ފޭރިގަނެފައިވެއެވެ. މި ފައިސާ ފޭރުމަށް ހޭދަވެފައިވަނީ ގާތްގަނޑަކަށް 1 ގަޑިއިރާ 49 މިނެޓް ކަމަށްވެސް ފުލުހުން މައުލޫމާތުދެއެވެ.
ފުލުހުން ބުނެފައިވަނީ މި މައްސަލައިގައި މީހަކު ހައްޔަރު ކޮށްފައިވާ ކަމަށެވެ.
މިކަމަކީ ގިނަބަޔަކު ބައިވެރިވެގެން އިންތިޒާމުވެގެން ހިންގާފައިވާ ސްކޭމެއް ކަމަށާއި، މި ފައިސާ އޭޓީއެމްތަކުން ނެގުމުގައި ގިނަ ބަޔަކު ބައިވެރިވެފައިވާ ކަމަށްވެސް ފުލުހުން މައުލޫމާތު ދީފައިވެއެވެ. އަދި މިކަމުގައި ބައިވެރިވި އެކި ފަރާތްތަކަށް މާލީ ގޮތުން އެކި އަދަދުތައް ލިބިފައިވާ ކަމަށްވެސް ބުނެފައިވެއެވެ.
ފުލުހުން ބުނެފައިވަނީ މި ފައިސާގެ ތެރެއިން 62 އިންސައްތަ ފައިސާ ރާއްޖޭގެ އެކި ކަންކޮޅުތަކުގައި ހުރި 8 އޭޓީއެމްއަކުން ނަގާފައިވާ ކަމަށެވެ. މިފައިސާގެ 19 އިންސައްތަ ކްރިޕްޓޯ ކަރެންސީ އަދި އިލެކްޓްރޯކިން އަގުބޮޑު މުދާ ގަތުމަށް ބޭނުން ކޮށްފައިވާކަންވެސް ފުލުހުން ހާމަކޮށްފައިވެއެވެ. އަދި 18 އިންސައްތަ ފައިސާ ބޭންކުން ފްރީޒް ކޮށްފައިވާ ކަމަށް ވެސް ފުލުހުން މައުލޫމާތު ދީފައިވެއެވެ.