ކާމިޔާބު ފިލްމުތަކެއް ގެނެސްދީފައިވާ ބޮލީވުޑްގެ ޑައިރެކްޓަރު އާނަންދު އެލް ރާއީ، އިންޑިއާގެ ދެކުނުގެ އެކްޓަރު ދަނޫޝްއާ އެކީ ހަދަން އިއުލާންކޮށްފައި އޮތް ފިލްމު "ތެރޭ އިޝްގް މޭ" ގެ ބަތަލާއަކަށް ޓްރިޕްތީ ދިމްރީ ނަގާފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ މިކަން ވަރަށް އަވަހަށް އާނަންދު އިއުލާން ވެސް ކުރާނެ އެވެ.
މިހާރު ބޮލީވުޑްގައި ވަރަށް ބާރަށް ކުރިއަަރަމުން އަންނަ ޒުވާން ބަަތަލާ ޓްރިޕްތީ "ތެރެ އިޝްގް މޭ" ގެ ބަތަލާއަކަށް ނަގާފައިިވާ ކަމަށް މީޑިއާތަކުން މިއަދު ރިޕޯޓްކުރި އިރު، މިދިޔަ އަހަރުގެ ޖޫންގައި އިއުލާންކުރި ފިލްމުގެ ބަތަލާ އަކީ ކިއާރާ އަދުވާނީކަމުގެ އަޑުތަކެއް ވެސް މިދިޔަ އަހަރުގެ ފަހުކޮޅު އެރި އެވެ.
ނަމަވެސް ފިލްމު އިއުލާންކުރި ފަހުން އެއާ ބެހޭ އިތުރު އެއްވެސް ތަފުސީލެއް އާނަންދު ނުދެ އެވެ. "ރާންޖަނާ" އާއި "ތަނޫ ވެޑްސް މަނޫ" ފަދަ މަގުބޫލު ފިލްމުތައް ގެނެސްދިން ޑައިރެކްޓަރުގެ އެންމެ ފަހުގެ ފިލްމަކީ ދަނޫޝް އާއި ސާރާ އަލީ ޚާންގެ އިތުރުން އަކްޝޭ ކުމާރާ އެކީ 2021 ގައި ގެނެސްދިން "އަތުރަންގީ ރޭ" އެވެ.
މިދިޔަ އަހަރު ރިލީޒްކުރި ރަންބީރް ކަޕޫރްގެ "އެނިމަލް" ގައި ޓްރިޕްތީ ކުޅުނު ޖެހިލުންކުޑަ "ބޯލްޑް" ރޯލަށް ފަހު، އޭނަގެ މަޝްހޫރުކަން އިތުރުވެ، ޑިމާންޑް ވަނީ ވަރަށް ބޮޑަށް އުފުލިގެން ގޮސްފައިވެ އެވެ. އުންމީދީ ބަތަލާ ދެން އެންމެ އަވަހަށް ފެންނާނީ މި މަހުގެ 19 ގައި ކަރަންް ޖޯހަރްގެ ދަރުމާ ޕްރޮޑަކްޝަނުން ގެނެސްދޭން ހަމަޖެހިފައިވާ ރޮމޭންޓިކް ކޮމެޑީ "ބޭޑް ނިއުސް" އިންނެވެ.
މި އަހަރު ރިލީޒްވާން ހުރި ޓްރިޕްތީގެ އިތުރު ފިލްމުތަކުގެ ތެރޭގައި "ދަޅަކް 2" އާއި "ބޫލް ބުލައްޔާ 3" އަދި "ވިކީ ވިދިއާ ކާ ވޯ ވާލާ ވީޑިއޯ" ހިމެނެ އެވެ.