ރައްޔިތުންގެ މަޖިލީހުގައި އެމްޑީޕީ ތަމްސީލުކުރައްވާ 12 މެމްބަރުންގެ ކިބައިގައި ހިތްވަރު އެބަހުރި ކަމަށާއި ރައްޔިތުންގެ ހައްގުގައި ކުރިއަށް އޮތް ތަނުގައި ވެސް ކުއްލި މައްސަލަ ވައްދާނެ ކަމަށް މަޖިލީހުގެ މައިނޯރިޓީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެ އެވެ.
އެމްޑީޕީން ރޭ ބޭއްވި ޖަލްސާގައި ވާހަކަދައްކަމުން ނާޒިލް ވިދާޅުވީ މަޖިލިސް ފެށޭ ވަގުތާއި ދިމާކޮށް ރައްޔިތުންގެ ހައްގުގައި ކުއްލި މައްސަލަ ހުށަހަޅަންޖެހޭނަމަ އެކަން ކުރާނެ ކަމަށާއި އެމްޑީޕީގެ މެމްބަރުން ފަހަތަށް ނުޖެހޭނެ ކަމަށެވެ. އަދި އެމްޑީޕީގައި 12 މެމްބަރުން ތިބުމުން ކުއްލި މައްސަލަ 13 މެމްބަރުންގެ ސޮޔާއެކު ވެއްދޭ ގޮތް ހަދަން ޕީއެންސީން މަސައްކަތް ކުރާ ކަމަށާއި އެކަން އެގޮތަށް ކޮށްފިނަމަ އެމްޑީޕީގައި 13 މެމްބަރުން ތިބޭ ދުވަސް ވެސް ފެންނާނެ ކަމަށް ނާޒިލް ވިދާޅުވި އެވެ.
"ސޮއިކޮށްދޭނެ 13 މެމްބަރުން ތިބޭނެ. އެ 13 މެމްބަރުންގެ ސޮޔާއެކީ ވެސް ވައްދާނަން،" ނާޒިލް ވިދާޅުވި އެވެ.
ނާޒިލް ވިދާޅުވީ މަޖިލީހަށް ހުށަހަޅާ ކުއްލި މައްސަލަތައް ބަލައިނުގަންނަ ނަމަ ދެންވެސް ކުރަންޖެހޭ ކަންތައް އެމްޑީޕީގެ މެމްބަރުން ކުރާނެ ކަމަށެވެ. އެކަން ކުރުމުގައި ފަހަތަށް ނުޖެހޭނެ ކަމަށާއި އެމްޑީޕީގެ 12 މެމްބަރުން މަސައްކަތް ކުރަނީ ވަރަށް ހިތްވަރާ އެކީ ވަރަށް އެކީގައި ކަމަށްވެސް ވިދާޅުވި އެވެ.
އެމްޑީޕީން ފާއިތުވި ހަފްތާގައި މަޖިލީހަށް ހުށަހެޅި ހުރިހާ ކުއްލި މައްސަލަތަކެއް ޕީއެންސީގެ މެމްބަރުން ވަނީ ބޭރުކޮށްލާފަ އެވެ. ޕީއެންސީގެ މެމްބަރުން ތުހުމަތު ކުރާ ގޮތުގައި އެމްޑީޕީން ކުއްލި މައްސަލަތައް ވައްދަނީ މަޖިލީހުގެ ވަގުތު ނަގާލުމުގެ ގޮތުންނެވެ.