އައްޑޫގެ ޓޫރިޒަމް ޒޯންތަކުން ބިން ލިބިފައިވާ ފަރާތްތަކަށް އެ ބިންތައް ތަރައްގީ ކުރަން ބޭނުންވާ މާލީ އެހީތެރިކަން ފޯރުކޮށް ދޭން މަސައްކަތް ކުރައްވާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ވެރިކަން ކުރާ ޕީއެންސީން ރޭ މާލޭގައި ބޭއްވި ހަރުގެ ޖަލްސާގައި މިނިސްޓަރު ވިދާޅުވީ ޓޫރިޒަމަށް ދޫކޮށްފައި ހުރި ބިންތައް ތަރައްގީ ކުރެވޭނެ ގޮތެއް ފަހިކޮށް ދިނުމަށް އައްޑޫގެ ވަަރަށް ގިނަ ބަޔަކު އެދިފައިވާ ކަމަށެވެ.
"އައްޑޫގެ ޓޫރިޒަމް ދާއިރާގައި މަސައްކަތްކުރާ ބޭފުޅުން ވިދާޅުވީ އެ ބޭފުޅުން ބޭނުން ވަނީ އެތާނގައި ހުރި ޓޫރިޒަމް ޒޯންތައް، ސިޓީ ކައުންސިލުން ދޫކޮށްފައި ހުރި ބިންތައް ތަރައްގީކުރުމަށް ކަމަށް." ފައިސަލް ވިދާޅުވި އެވެ.
މިނިސްޓަރު ވިދާޅުވީ މިހާރު މަސައްކަތް ކުރަމުން އަންނަނީ ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) މެދުވެރިކޮށް ފައިސާ ހަމަޖައްސޭނެ ގޮތްތައް ހަމަޖައްސަމުން ކަމަށެވެ.
"އަޅުގަނޑުމެން މި މަސައްކަތް ކުރަނީ ބީއެމްއެލް އާއި އެމްއައިބީ ތްރޫކޮށް އިރާދަކުރެއްވިއްޔާ މި އަހަރުގެ ތެރޭގައި އަހަރަކު އެންމެ މަދުވެގެން 100 މިލިއަން ރުފިޔާ މިއިން ކޮންމެ ބޭންކަކުން އެތަންތަން ޑިވެލޮޕް ކުރުމަށް ފެސިލިޓޭޓްކޮށް ދިނުމަށް." ފައިސަލް ވިދާޅުވި އެވެ.
އައްޑޫގައި ޓޫރިޒަމްގެ ފަސް ޒޯނެއް ކަނޑައަޅައި އެތަންތަނުން 98 ބިމެއް އެކި ފަރާތްތަކާ ހަވާލުކޮށްފައިވެ އެވެ. ބިންތައް ހަވާލުކުރީ 2021 ގެ ތެރޭގަ އެވެ. ނަމަވެސް އެތަންތަން ތަރައްގީ ފައިސާ ހޯދުމުގައި ހުރި ދަތިތަކާ ހެދި އެއްވެސް ބިމެއްގައި މިހާތަނަށް ފެސިލީޓީއެއް ނެތެވެ.
ނަމަވެސް އައްޑޫގައި 2022 ވަނަ އަހަރު ބޭއްވި "ޓޫރިޒަމް ފޯރަމް" ގައި އޭރުގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެފައި ވަނީ ބިންތައް ތަރައްގީކުރަން ބޭނުންވާ ފައިސާ ލިބޭނެ ގޮތް ހަމަޖެހިފައި އޮތް ކަމަށެވެ. އެގޮތުން އެކަމަށް ބޭނުންވާ ފައިސާ ދޭނީ މޯލްޑިވްސް ފަންޑް މެނޭޖްމަންޓް މެދުވެރިކޮށް ކަމަށް ވިދާޅުވެފައިވެ އެވެ.
އޭރު ފައްޔާޒި ވިދާޅުވި ގޮތުގައި އައްޑޫގެ ޓޫރިޒަމް ޒޯންތައް ތަރައްގީކުރަން އެހީތެރިކަން ދޭން ނިންމާފައި އޮތް ގޮތަކީ އެސްއެމްއީ ބޭންކުން ކޮންޓްރެކްޓަ ފައިނޭންސަރެއް ހޯދައިގެން ތަންތަން ތަރައްގީކުރުން ކަމަށެވެ.
އައްޑޫގެ ޓޫރިޒަމް ޒޯންތަކަކީ އެމްޑީޕީ ސަރުކާރުން އައްޑޫގެ ބެޑް ކެޕޭސިޓީ 8،000 އަށް އިތުރުކުރަން ރާވާފައިވާ ޕްލޭނުގެ ތެރެއިން ލޯކަލް ޓޫރިޒަމް ކުރިއަރުވަން ކަނޑައެޅި ޒޯންތަކެކެވެ. އައްޑޫގެ ޓޫރިޒަމް ޒޯންތަކަކީ ހިތަދޫ "މާމެން ބީޗް ޓޫރިޒަމް ޒޯން" އާއި ހުޅުދޫ "ކޭވައް ބީޗް" މާފިޝި ޓޫރިޒަމް ޒޯނާއި "ކޯގަންނު ބީޗް" މުލިމަތި ޓޫރިޒަމް ޒޯނާއި އަދި ފޭދޫ "ސަވާ ބީޗް" ދިގިހެރަ ޓޫރިޒަމް ޒޯނެވެ.
ރޭގެ ޖަލްސާގައި ޓޫރިޒަމް މިނިސްޓަރު ވިދާޅުވީ އައްޑޫގައި ޓޫރިޒަމް ކުރިއަރުވައި ފުޅާކުރުމަކީ ސަރުކާރުން ވަރަށް ބޮޑު އިސްކަމެއް ދޭ ކަމެއް ކަމަށެވެ. އެގޮތުން މި އަހަރުގެ ޑިސެމްބަރުގެ ތެރޭގައި ޝަންގްރިއްލާ ވިލިގިލި ރިސޯޓް އެންޑް ސްޕާ ހުޅުވޭތޯ އަމާޒު ހިފާފައިވާ އިރު، ޗައިނާ އިން މި އަހަރުގެ ތެރޭގައި އައްޑު އަށް ސީދާ ވައިގެ ދަތުރުތަކެއް ވެސް ފަށާނެ ކަމަށެވެ.