އަލް މަދީނާ އިންވެސްޓްމެންޓް ޕްރައިވެޓް ލިމިޓެޑުން ހުޅުމާޅޭގައި ސްކޫލް އަޅާ ބިން ހޯދާފައިވަނީ ނުހައްގުން ކަމަށް ބުނެ ފަތުރަމުންދާ ވާހަކަތައް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ދޮގުކުރައްވައިފި އެވެ.
ޝަހީމް ވިދާޅުވީ މަދީނާ އިންވެސްޓްމަންޓްގެ ސްކޫލް އަޅާ ބިން ހޯދާފައިވަނީ ނުހައްޤުން ކަމަށް ބުނެ ފަތުރަމުން ދަނީ މުޅިން ޙަޤީޤަތާ ޚިލާފު ވާހަކަތަކެއް ކަމަށާއި ސްކޫލް އަޅާ ބިމަކީ އޮންނަ އުޞޫލުން އެންމެހައި އިޖްރާއާތުތައް ފުރިހަމަކޮށް ކުރީގެ ސަރުކާރުގެ ދުވަސްވަރު ހަމަޖެހުނު ބިމެއް ކަމަށެވެ.
ސަރުކާރު ބަދަލުވުމަށް ފަހު އެގްރީމެންޓަށް އެއްވެސް ބަދަލެއް ގެނެސްފައި ނުވާ ކަމަށާއި ބިމަކީ ކުލި ދައްކާގޮތައް އޮތް ބިމެއް ކަމަށް ޝަހީމް ވިދާޅުވި އެވެ. އަދި ބިމުގެ އަރިމަތީގައި ބިނާކުރާ މިސްކިތަކީ 2،000 މީހުންނަށް ނަމާދު ކުރެވޭ ގޮތައް ލައިބްރަރީއަކާއެކު ދެ ބުރިއަށް އަޅާ މިސްކިތެއް ކަމަށްވެސް ވިދާޅުވި އެވެ.
"ނުޙައްޤުން ބިމެއް ހޯދިކަމަށް ބުނެ އަޅުގަނޑާ ގުޅުވައިގެން ދޮގު ވާހަކަތައް ނުފެތުރުމަށް އެދެން. ތެދު ޙަޤީޤަތުގެ މައްޗަށް ވާހަކަ ދެއްކުމަށް އެދެން، ޝަހީމް ވިދާޅުވި އެވެ.
ޝަހީމް ވަނީ ދޮގު ވާހަކަތައް ފެތުރުމަކީ ނަފްރަތު އުފެދި މުޖުތަމަޢު ބައިބައި ވެގެން ހިނގައިދާނެ ކަމެއް ކަމަށާއި ބިނާކުރަނިވި ޚިޔާލަށް މަރުހަބާ ކިޔާނެ ކަމަށްވެސް ވިދާޅުވެފަ އެވެ.