ބޮލީވުޑްގެ އެކްޓަރު ވިކީ ކޯޝަލަކީ ވަރަށް މޮޅު އެކްޓަރެކެވެ. އެކަމާ ދެބަސްވާނެ ބަޔަކު ނެތެވެ. އޭނަ އަކީ ނެޝަނަލް އެވޯޑް ވެސް ހޯދާފައިވާ ތަރިއެކެވެ.
އެކަމަކު ވިކީ އަކީ މިހާތަނަށް ފިލްމުތަކުގައި އެހާ ބޮޑަށް ނެށި އެކްޓަރެއް ނޫނެވެ. އެހެންވެ ގިނަ ބަޔަކަށް މިހާތަނަށް އޮތީ ވިކީގެ ނެށުމުގެ އަސްލު ހުނަރު ނުފެނި އެވެ. ނަމަވެސް 2022 ގައި ރިލީޒްކުރި ފިލްމު "ގޯވިންދާ ނާމް މޭރާ" ގައި އޭނަ ވަނީ ނެށިދާނެކަން ދައްކުވައި ދީފަ އެވެ.
އެހެން ވިޔަސް މި ވަރުގެ ހައިރާންކަމެއް ބެލުންތެރިންނަށް އޭނަ ގެނެސްދީފާނެ ކަމަކަށް އޮތީ ގަބޫލު ނުކުރެވި އެވެ. މި މަހުގެ 19 ގައި ރިލީޒްކުރަން ތާވަލުކޮށްފައިވާ ރޮމޭންޓިކް ކޮމެޑީ "ބޭޑް ނިއުސް" އިން އާންމުކުރި ފުރަތަމަ ލަވަ "ތޯބާ ތޯބާ" މި ވަނީ މިހާރު ވަރަށް ބޮޑަށް ޓްރެންޑްވެފަ އެވެ. މި ލަވައިގެ ޖާދޫގެ ސިއްރަކީ ލަވައިގައި ވިކީ ދައްކުވައި ދީފައިވާ ހިތްގައިމު ނެށުމެވެ.
މާ ފޯރި ގަދަ ނޫން އަދި އަޑު އަހައިލަން ވެސް ފަސޭހަ މިއުޒިކަކަށް ހަދާފައިވާ ލަވައިގައި ވިކީ ވަނީ ވަރަށް އުނދަގޫ ސްޓެޕްތަކަކާ އެކީ ގިނަ ބައެއްގެ ހިތްތައް އަތުލައިފަ އެވެ. އެގޮތުން "ތޯބާ ތޯބާ" ލަވައިގައި އޭނަ ދެއްކި ނެށުމަށް އެތައް ބަޔަކު އަންނަނީ ތައުރީފު ކުރަމުންނެވެ. އަދި މި ލަވަ އަށް އެކިއެކި މީސްމީހުން ނަށައި ސޯޝަލް މީޑިއާގައި ކްލިޕްތައް ވެސް އާންމު ކުރަމުން އަންނަކަން ފާހަގަކޮށްލެވެ އެވެ.
އެކަމާ ވިކީ ހުރީ ވަރަށް ވެސް އުފަލުންނެވެ. އަދި އޭނަ އެންމެ އުފާވި ކަމަކީ ބޮލީވުޑްގައި ނެށުމަށް އަރާހުރި އެކްޓަރުންގެ ތެރޭގައި ހިމެނޭ ރިތިކް ރޯޝަން، ވިކީގެ ނެށުމަށް ތައުރީފު ކުރުމުންނެވެ. އަދި އެކަން އޭނަ ސިފަކުރީ އޮސްކާ އެވޯޑެއް ލިބުން ކަހަކަ ކަމަކާ އެވެ.
ވިކީގެ މޮޅު ނެށުމުގެ ހުނަރުން ފޭނުން އުފާކޮށް ދީފައިވާ އިރު، އޭނަގެ އަންހެނުން މަޝްހޫރު ބަތަލާ ކެޓްރީނާ ކައިފަކީ ބޮލީވުޑްގައި ނެށުމަށް އެންމެ ކުޅަދާނަ އެއް ބަތަލާ އެވެ. އެހެންވެ އަންހެނުންގެ ހުނަރުގެ ނުފޫޒު ވެސް ވިކީ އަށް މިއޮތީ ފޯރާފައިވާ ކަމަށް ބުނެވިދާނެ ދޯ އެވެ؟
"ބޭޑް ނިއުސް" އަކީ ކަރަން ޖޯހަރްގެ ދަރުމާ ޕްރޮޑަކްޝަނަށް އާނަންދު ތިވާރީ ޑައިރެކްޓްކޮށްފައިވާ ފިލްމެކެވެ. މީގެ ކާސްޓްގައި ޓްރިޕްތީ ދިމްރީ އާއި އައްމީ ވާކް ވެސް ހިމެނެ އެވެ.
"ބޭޑް ނިއުސް" އިން ވަނީ ދެވަނަ ލަވައެއް ވެސް އާންމުކޮށްފަ އެވެ. ވިކީ އާއި ޓްރިޕްތީގެ ވަރަށް ގައިގޯޅި މަންޒަރުތަކެއް ފެންނަ އެ ލަވައިގެ ނަމަކީ "ޖާނަމް" އެވެ.