ނައިޖީރިއާގެ ސްކޫލެއް ވެއްޓި 22 ދަރިވަރަކު މަރުވެ، 130 އަށް ވުރެ ގިނަ ދަރިވަރުން ޒަހަމްވެގެން ފަރުވާން ދޭން ފަށައިފި އެވެ.
މީޑިއާތަކުން ބުނީ އިއްޔެ މި ހާދިސާ ހިނގީ ޕްލެޓޯ ސްޓޭޓްގެ ސެއިންޓް އެކަޑަމީގައި ކަށެވެ. ދަރިވަރުންތަކެއް އިމްތިހާނެއްގައި ތިއްބައި ތިއްބައި ސްކޫލް ވެއްޓުނު ހާދިސާގައި އިމާރާތުގެ ދަށުގައި ވެސް އެތައް ދަރިވަރުންނެއް ތާށިވެފައިވާތީ ސަލާމަތް ކުރުމުގެ މަސައްކަތް ކަމާބެހޭ ފަރާތްތަކުން އަންނަނީ ކުރަމުންނެވެ.
މީޑިއާތަކުން ބުނީ މި ހާދިސާގައި މަރުވި ކުދިންގެ އަދަދު އަދިވެސް އިތިރުވުން އެކަށީވެންވާ ކަމަށެވެ.
ސެއިންޓް އެކަޑެމީ އަކީ 1،000 އެއްހާ ދަރިވަރުން ކިޔަވަމުން އަންނަ ސްކޫލެކެވެ. ނަމަވެސް ސްކޫލް ބޮލަށް ވެއްޓުނު ސަބަބެއް އަދި ސާފެއް ނުވެ އެވެ.
މި ހާދިސާއާ ގުޅިގެން ޔުނިސެފްގެ ނައިރީޖިރިއާ ގޮފިން ކަންބޮޑޮވުން ފާޅުކޮށްކޮށްފައިވެ އެވެ. އަދި މިއީ ވަރަށް ވެސް ހިތާމަވެރި ހާދިސާއެއް ޖަމަށް ޔުނިސެފްގެ ނައިޖީރިއާގެ ރެޕްރެޒެންޓެޓިވް ކްރިސްޓިއަން މަންޑުއޭޓް ވިދާޅުވި އެވެ.
މީޑިއާތަކުން ބުނީ މި ފަހަކަށް އައިސް ނައިޖީރިއާގައި އުސް އިމާތާތްތައް ވެއްޓުމުގެ ހާދިސާތައް އިތުރުވަމުންދާކަން ވަަރަށް ބޮޑަށް ފާހަގަކުރެވިފައިވާ ކަމަށެވެ. އެގޮތުން 2021 ގައި ވެސް ހަދަމުން ދިޔަ އުސް އިމާރާތެއް ވެއްޓި 45 މީހަކު މަރުވެފައިވެ އެވެ.