ޝޫޓިން ފެށުމުގެ ތައްޔާރީތައްވަމުން އަންނަ ތެލެގޫ އެކްޓަރު ޕްރަބާސްގެ "ސްޕިރިޓް" ގެ ކާސްޓްގައި ބޮލީވުޑް ތަރިން ކަމަށްވާ އައިޝްވާރިއާ ރާއީ އާއި ކެޓްރީނާ ކައިފް ހިމެނޭ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ ބައެއް މީޑިއާތަކުން ބުނީ މިދިޔަ އަހަރު ރަންބީރް ކަޕޫރާ އެކީ "އެނިމަލް" ގެނެސްދިން ސަންދީޕް ރެޑީ ވަންގާ ޑައިރެކްޓްކުރާ ފިލްމުގެ ވިލަންގެ ރޯލަށް ނަގާފައި ދަނީ ދެކުނު ކޮރެއާ ދަރިކޮޅުގެ އެމެރިކާގެ އެކްޓަރި މާ ޑޮންގް-ސިއޮކް ކަމަށެވެ.
އޭނަ އަކީ "ޓްރެއިން ޓު ބުސާން" އާއި "ދި އައުޓްލޯސް" ގެ އިތުރުން "ވަން-އޮން-ވަން" ފަދަ ފިލްމުތަކުގައި މަސައްކަތްކޮށްފައިވާ އެކްޓަރެކެވެ.
ބުޝަން ކުމާރުގެ ޓީ ސީރީޒުން ހަދާ "ސްޕިރިޓް" ގެ ކާސްޓާ ބެހޭ ގޮތުން މިހާރު މީޑިއާތަކުގައި ވަރަށް ގިނަ ވާހަކަތަކެއް ދެކެވެމުން ދިޔަ ނަމަވެސް، މިކަމާ ގުޅޭ ގޮތުން ފުލްމުގެ ޓީމުން އަދި ރަސްމީކޮށް އެއްވެސް އެއްޗެއް ނުބުނެ އެވެ. ނަމަވެސް ސަލްމާން ޚާންގެ ކުުރީގެ ދެ ލޯބިވެރިން ކަމަށްވާ އައިޝްވާރީ އާއި ކެޓްރީނާ "ސްޕިރިޓް" އިން ފެންނާނެ ކަމަށް ބުނާތީ ފޭނުން މިހާރު ތިބީ މިކަމުގެ ހަގީގަތަކީ ކޮބައިތޯ ބަލައިލަން ވަރަށް ބޮޑަށް ކެތްމަދުވެފަ އެވެ.
މިހާރު ވަރަށް މަދުން ފިލްމުތަކުން ފެންނަ އައިޝްވާރިއާގެ އެންމެ ފަހުގެ މިދިޔަ އަހަރުގެ ކުރީކޮޅު ގެނެސްދިން ތަމަޅަ ފިލްމު "ޕޮނިޔިން ސެލްވަން 2" އެވެ.
"ސްޕިރިޓް" އަކީ 2021 ގައި އިއުލާންކުރި ފިލްމެކެވެ.
"ބާހްބަލީ" ކުޅެގެން ބޮޑު މަޝްހޫރު ކަމެއް ލިބުނު ޕްރަބާސްގެ އެންމެ ފަހުގެ ފިލްމަކީ މިދިޔަ މަހުގެ 27 ގައި ރިލީޒްކޮށް، މިހާރު ބޮކްސް އޮފީހުގައި ރަސްކަން ކުރަމުން އަންނަ ސައިންސް ފިކްޝަން އެކްޝަން ފިލްމު "ކަލްކީ: 2898 އޭޑީ" އެެވެ.