ރޭ ކައިވެނީގެ ރަސްމީ ހަފުލާ ބޭއްވި އިންޑިއާ "ބޮޑު ކައިވެންޏެއް" 320 މިލިއަން ޑޮލަރަށް ވުރެ ބޮޑު ހޭދައެއްދަކޮށްފައިވާ ރިޕޯޓްތައް ބުނެފި އެވެ.
މި ކައިވެންޏަކީ އިންޑިއާގެ މަހުޖަނު މުކޭޝް އަމްބާނީގެ ހަގު ދަރިފުޅު އާނަންތު އަމްބާނީގެ ކައިވެންޏެވެ. މި އަހަރުގެ ކުރީކޮޅުން ފެށިގެން މި ކައިވެންޏާ ގުޅޭ ތަފާތު ހަފުލާތައް ބާއްވަމުން އަންނަ އިރު، ރޭ ކައިވެނީގެ ރަސްމީ ހަފުލާ ބޭއްވީ މުމްބާއީގެ ޖިއޯ ވޯލްޑް ކޮންވެންޝަން ސެންޓަރުގަ އެވެ.
އެ ހަފުލާގައި މުޅި ބޮލީވުޑް ބައިވެރިވެފައިވާ އިރު، އިންޑިއާގެ ސިޔާސީ ދާއިރާގެ ބޭފުޅުންނާއި ކުޅިވަރު ޝަހުސިއްތުންނާއި ނުފޫޒު ގަދަ އެތައް ވިޔަފާވެރިންނެއް ވެސް ބައިވެރިވެ އެވެ. މީގެ އިތުރުން އިންޑިއާ އިން ބޭރުގެ ނުފޫޒު ގަދަ އެތައް ބަޔަކު ވެސް އާނަންތު، 29، އާއި ބައިވެރިޔާ ރާދިކާ މާޗަންޓް، 29، ގެ ކައިވެނީގެ ހަފުލާގައި ބައިވެރިވި އެވެ.
އޭގެ ތެރޭގައި އިނގިރޭސިވިލާތުގެ ކުރީގެ ބޮޑުވަޒީރުން ކަމަށްވާ ބޮރިސް ޖޯންސަނާއި ޓޯނީ ބްލެއާ އަދި އެމެރިކާގެ މަޝްހޫރު ސެލެބްރިޓިން ކަމަށްވާ ކިމް ކާޑޭޝަން އާއި ކްލޯއީ ކާޑޭޝަންގެ އިތުރުން ފިލްމީ ތަރި ޖޯން ސީނާ ފަދަ އެތައް ބަޔަކު ހިމެނެ އެވެ. ފީފާގެ ރައީސް ޖިއާނީ އިންފަންޓީނޯ ވެސް ހަފުލާގައި ބައިވެރިވަޑައިގަތެވެ.
އާނަންތ އާއި ރާދިކާގެ ކައިވެނީގެ ރަސްމީ ހަފުލާ ރޭ ބޭއްވި އިރު، މި ކައިވެނީގެ ހަރަކާތްތައް އެއްކޮށް ނިންމައިލަން ހަމަޖެހިފައި ވަނީ ހޯމަ ދުވަހު އެވެ. އެ ދުވަހާ ހަމައަށް މުމްބާއީގެ ތްރެފިކް ފްލޯ އަށް ވެސް ބަދަލުތަކެއް ގެނެސްފައިވެ އެެވެ އެކަމާ ގުޅިގެން އާންމުންނަށް ކުރިމަތިވަވަމުންދާ ތުރާގެ ވާހަކަ ވެސް މި ދަނޑިވަޅުގައި ދަނީ ދެކެވެމުންނެވެ.
އަމްބާނީގެ އާއިލާ އިން ކައިވެންޏަށް ބޮޑު ހަރަދެއްކޮށްފައިވާ އިރު، މިކަން ބޮޑު "ކުޅިމަަޖާގަނޑަކަށް" ހަދާފައިވާތީ ވެސް އިންޑިއާގެ ބައެއް އާންމުންނާއި އަވައްޓރި ބައެއް ގައުމުތަމުގެ މީހުންގެ ފާޑުކިޔުންތަކައި މަލާމާތް ވެސް އަމާޒުވެފައިވެ އެވެ.
ގާތްގަނޑަަހަށް ހަތް މަހަށް މި ކައިވެނީގެ އެކިއެކި ހަރަކާތްތައް ދެނިގެން ދިޔަ އިރު، އެކިއެކި ހަފުލާތަކަށް ވަރަށް ބޮޑެތި ހަރަދުތަކެއްކޮށްފައިވެ އެވެ. ހާއްސަކޮށް ބޭރުގެ މަޝްހޫރު މީސްމީހުން އިންޑިއަށް ގެންދަން ބޮޑު ހޭދައެއްކޮށްފައިވެ އެެވެ. މި ކައިވެނީ ގެ އެކި ހަފުލާތަކުގައި ބޭރުގެ ބައެއް މަޝްހޫރު ފަންނާނުން ޕަފޯމް ވެސްކޮށްފައިވެ އެވެ.
އޭގެ ތެރޭގައި ރިއާނާ، ޖަސްޓިން ބީބާ، ޑްރޭކް އަދި އެޑެލް ފާހަގަކޮށްލެވެ އެވެ. މި ކައިވެނީގެ އިވެންޓެއްގައި ކުރިން ބައިވެރިވި މީހުންގެ ތެރޭގައި އެމެރިކާގެ މަހުޖަނުން ކަމަށްވާ ބިލް ގޭޓްސް އާއި ފޭސްބުކްގެ ވެރިޔާ މާކް ޒަކަބާގް ވެސް ހިމެނެ އެވެ.
މި ކައިވެނީގެ ހަރަކާތުގެ ތެރެއިން ދާދި ފަހުން އެތައް ހާސް ބަޔަލާ އެކީ އިޓަލީން ފުރައިގެން ކްރޫޒް ދަތުރެއް ވެސް ބާއްވާފައިވެ އެވެ.
ކައިވެންޏަށް ކުރި ހަރަދާ ބެހޭ ގޮތުން އަމްބަނީގެ އާއިލާ އިން އެއްޗެއް ނުބުނެ އެވެ. އަމްބާނީގެ މިލްކިއްޔާތު 116 ބިލިއަން ޑޮލަރަށް އަރަ އެވެ. އަދި އޭނަ އަކީ ދުނިޔޭގައި 11 ވަނަ އަށް އެންމެ މުއްސަނދި މީހާ އެވެ.
އާނަންތު އަކީ މުކޭޝް އާއި ނީތާ އަމްބާނީގެ ތިން ކުދިންގެ ތެރެއިން ހަގު ކުއްޖާ އެވެ. އަނެއް ދެ ކުދިންނަކީ އެއްމާބަނޑު ދެބެއިން ކަމަށްވާ 32 އަހަރުގެ އާކާޝް އަމްބާނީ އާއި އީޝާ އަމްބާނީ އެވެ. އެ މީހުން ކައިވެނިކޮށް ދަރިން ވެސް ލިބިފައިވެ އެވެ.