ރައީސް ޑރ މުހައްމަދު މުއިއްޒުގެ "ހިތް އަތުލަން" ސިހުރި ހެދިކަމުގެ ތުހުމަތުގައި ހައްޔަރުކުރި އެންވަޔަރަމަންޓް މިނިސްޓްރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ބަންދުން ދޫކޮށްލައިފިއެވެ.
އެ މައްސަލައިގައި އޭނައާ އެކޯ ކޮއްކޮއަކާއި އިތުރު މީހަކު ވެސް ހައްޔަރުކުރި އެވެ. އެނގިފައިވާ ގޮތުގައި ޝަމްނާޒާއި ކޮއްކޮ ހައްވާ ސަނާ ސަލީމް ބަންދުން ދޫކޮށްލީ ރޭގެ ވަގުތެއްގަ އެވެ.
ސިހުރު ހެދި ކަމުގެ ތުހުމަތުގައި ޝަމްނާޒް ހައްޔަރުކުރީ މިދިޔަ މަހުގެ 23 ގަ އެވެ. އެ މައްސަލައިގައި ހައްޔަރުކުރީ ޝަމްނާޒާއި ސަނާގެ އިތުރުން ތ. ކިނބިދޫ ހުސައިން ސަމީރެވެ.
އެ މީހުން ހައްޔަރުކޮށް ދެ ފަހަރެއްގެ މަތިން ޝަމްނާޒާއި ސަނާގެ ބަންދުގެ މުއްދަތު ކޯޓުން އިތުރުކުރި އެވެ. އެގޮތުން ފުރަތަމަ ފަހަރަށް ބަންދަށް ޖެހީ 7 ދުވަހެވެ. އޭގެ ފަހުން ބަންދަށް ޖެހީ ފަސް ދުވަހެވެ.
ޝަމްނާޒް ސްޓޭޓް މިނިސްޓަރުކަމުން ވަކިކުރި މައްސަލައިގައި ހައްޔަރުކުރުމާ ގުޅިގެންނެވެ. އަދި އޭގެ ފަހުން ރައީސް އޮފީހުގެ މިނިސްޓަރަކަށް ހުންނެވި ޝަމްނާޒްގެ ކުރީގެ ފިރިމީހާ އާދަމް ރަމީޒު މަގާމުން ސަސްޕެންޑްކޮށްފައިވެ އެވެ.
ޝަމްނާޒްގެ ކޮއްކޮ ސަނާ ހައްޔަރުކުރި އިރު އޭނަ އަކީ އެންވަޔަރަމަންޓް މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމުގަ އެވެ.