އަންނަ މަހުގެ ތެރޭގައި ޝޫޓިން ފަށަން ޕްލޭންކޮށްފައިވާ ބޮލީވުޑްގެ ކޮމެޑީ ފްރެންޗައިޒް "ހައުސްފުލް" ގެ ފަސް ވަނަ ބައިގެ ކާސްޓަށް ސަންޖޭ ދަތު ވެސް އިތުރުވެއްޖެ އެވެ.
އެކަން ފިލްމުގެ ޓީމުން މިއަދު ވަނީ ކަށަވަރު ވެސްކޮށް ދީފަ އެވެ.
"ހައުސްފުލް 5" ގެ ކާސްޓްގައި މި ސީރީޒްގެ ފިލްމުތަކުގެ އެންމެ އާންމު ދެ އެކްޓަރުން ކަމަށްވާ އަކްޝޭ ކުމާރާއި ރިތޭޝް ދޭޝްމުކާ އެކީ ތިން ވަނަ ބައިގެ ރޯލެއް ކުޅުނު އަބީޝެކް ބައްޗަން ވެސް ހިމެނެ އެވެ. މީގެ ރޯލެއް ކުރިން އަނިލް ކަޕޫރަށް ވެސް ހުށަހެޅި އެވެ. އެކަމަކު ފީގެ މައްސަލަގައި އުފެދުނު ހިޔާލު ތަފާތުވުންތަކަކާ ހެދި އޭނަ "ހައުސްފުލް 5" ދޫކޮށްލާފައިވެ އެވެ.
އަނިލް ފިލްމު ދޫކޮށްލި ފަހުން އަރުޖުން ރާމްޕާލް "ހައުސްފުލް 5" އަށް ނެގިކަމުގެ އަޑުތަކެއް އެރި އެވެ. އެކަމަކު އެކަން ކަށަވަރުކޮށް ދީފައެއް ނުވެ އެވެ. ދެހާސް ދިހައެއްގައި ގެނެސްދިން މީގެ ފުރަތަމަ ބައިގެ ރޯލެއް އަރުޖުން ކުޅުނެވެ.
"ހައުސްފުލް 5" ގެ ބަތަލުން ހަމަޖެހުނު ނަމަވެސް މީގެ ބަތަލާއިންނަކީ ކޮބައި ކަމެއް އަދިވެސް އިއުލާނެއް ނުކުރެ އެވެ.
އަންނަ އަހަރުގެ ޖޫން 6 ގައި ރިލީޒްކުރަން ހަމަޖެހިފައިވާ "ހައުސްފުލް 5" އަކީ ސާޖިދު ނަދިއަދުވާލާ ޕްރޮޑިއުސްކޮށް، ތަރޫން މުންސުކާނީ ޑައިރެކްޓްކުރާ ފިލްމެކެވެ. ތަރޫން އަކީ 2008 ގެ ކާމިޔާބު ފިލްމު "ދޯސްތާނާ" ގެ ޑައިރެކްޓަރެވެ.