ޑިފެންސް މިނިސްޓަރު ގައްސާން މައުމޫން ފުވައްމުލަކަށް ވަޑައިގެން މިއަދު ކައުންސިލާ ބައްދަލުކުރައްވައިފި އެވެ.
ކައުންސިލުން ބުނީ ރައްޔިތުންނާއި ގުޅުންހުރި ގިނަ ކަންތައްތަކެއްގެ މަޝްވަރާތަކާއި ޚިޔާލު ބަދަލުކުރެވުނު ބައްދަލުވުމުގައި ރައްޔިތުންގެ މަޖިލީހުގެ ފުވައްމުލައް ސިޓީ މެދު ދާއިރާގެ މެމްބަރު އަލީ ފަޒާދާއި ދެކުނު ދާއިރާގެ މެމްބަރު އިބްރާހިމް ހުސެއިންގެ އިތުރުން ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާގެ ޑެޕިއުޓީ މިނިސްޓަރ އަހުމަދު މުހައްމަދު ވެސް ބައިވެރިވެ ވަޑައިގެންނެވި ކަމަށެވެ.
ޑިފެންސް މިނިސްޓްރީގެ ދަށުން ފުވައްމުލަކުގެ ރައްޔިތުންނާއި ގުޅުންހުރި އެކި ކަންކަމުގައި ރައްޔިތުންގެ ހުރި ކަންބޮޑުވުންތަކާއި، ރައްޔިތުންނަށް ފޯރުކޮށް ދޭ ޚިދުމަތްތައް ދިނުމަށް މިހާރަށް ވުރެ ރަނގަޅަށް ކުރެވިދާނެ ގިނަ ކަންތައްތަކާއި، މިނިސްޓްރީ އާއި ކައުންސިލް ގުޅިގެން ކުރެވެން ހުރި އެކި ކަންކަމާއި މެދު ބައްދަލުވުމުގައި މަޝްވަރާކުރެވުނު ކަމަށެވެ.