އައްޑޫގައި މަގު ހެދުން ފަދަ ބޮޑެތި މަޝްރޫއުތަކެއް ކުރިއަށްދާ އިރު، މިފަދަ މަސައްކަތްތަކުގެ ތެރޭގައި ވަރަށް ބޮޑަށް އިސްރާފު ކުރުން ފެންނާތީ ހިތާމަކުރައްވާ ކަމަށް މޭޔަރު އަލީ ނިޒާރު ވިދާޅުވެއްޖެ އެވެ.
ހިތަދޫ ބޮޑުމަގުގެ ދެ ފޮޓޯއަކާ އެކީ އޭނަ ސޯޝަލް މީޑިއާ ޕޯސްޓެއްގައި ވިދާޅުވީ ދައުލަތުން ބޮޑު ހޭދައެއް ކޮށް މަގުތައް ހަދައި ނިމި ހަވާލު ނުވެވެނީސް ތާރު ކަޑައި ކޮންނަން ފެށުމަކީ ހިތާމަހުރި ކަމެއް ކަމެއް ކަމަށެވެ. އަދި ހިތަދޫގެ ބޮޑުމަގުގައި އަޅާފައިވާ ފެންހޮޅި 1،000 ވުރެ ގިނަ ފަހަރު ފަޅައިގެން ގޮސް މަރާމާތުކޮށްފައިވާ އިރު، ތަކުރާރުކޮށް އެ ހޮޅި ބަދަލު ނުކޮށް ތާރު ނާޅަން އިލްތިމާސް ކުރިޔަސް އެކަން ނުކޮށް ތާރު އަޅައި މަގު ނިންމުމުގެ ނަތީޖާ އަކީ ތާރު އަޅާފައިވާ މަގުތައް އަލުން ކަނޑައި ކޮންނަން ޖެހުން ކަމަށް ވިދާޅުވި އެވެ.
"ނަތީޖާ އަކީ ފޮޓޯއިން އެފެންނަ ހާލަތު. މި މަންޒަރު ކުރިއަށް ދުވަސްތަކުގައި މުޅި މި މަގުން ފެނިގެން ދާނެ. ދައުލަތުން ކުރާ ހޭދަ މި ގޮތަށް އިސްރާފުކުރުމަކީ ކޮށްގެން ވާނެ ކަމެއް ނޫން،" މޭޔަރު ވިދާޅުވި އެވެ. "އައްޑޫގައި ކުރެވޭ ގިނަ މަސައްކަތް މި ގޮތަށް އިސްރާފު ކުރެވިގެން ދާ ތަން ފެންނާތީ ހިތާމަ ކުރަން."
އޭނަ ވިދާޅުވީ އައްޑޫގެ މަގުތައް ޒަމާނީ ފެންވަރަށް ހެދިގެން ދިއުމަކީ ރައްޔިތުން ކުރަމުން އައި ދިގު ދެމިގެން ދިޔަ އުންމީދެއް ކަމަށެވެ.