އެމެރިކާގެ މަޝްހޫރު ސެލެބްރިޓީ ކިމް ކާޑޭޝަން އިންޑިއާގެ މަޝްހޫރު ބަތަލާ އައިޝްވާރިއާ ރާއީއާ އެކީ ނެގި ސެލްފީއަކަށް މީޑިއާގެ ސަމާލުކަން ލިބިއްޖެ އެވެ.
މި ސެލްފީ ނެގުމުގެ ފުރުސަތު ލިބުނީ މިހާރު ކުރިއަށްދާ އިންޑިއާގެ މަހުޖަނު މުކޭޝް އަމްބާނީގެ ހަގު ދަރިފުޅު އާނަންތު އަމްބާނީ އާއި ރާދިކާ މާޗަންޓްގެ ކައިވެނީގެ ހަވާސާގެ ހަފުލާއެއްގެ ތެރެއިން ރޭގަ އެވެ. އައިޝްވާރިއާއާ އެކީ ކިމް ސެލްފީއެއް ނަގާ އިރު، ކުރީގެ މިސް ވޯލްޑް ސެލްފީ ކެމެރާއާ ދިމާލަށް ބަލަހައްޓައިގެން ހިނިތުންވެގެން ހުންނަ ތަން ފެނެ އެވެ.
އަމްބާނީގެ ކައިވެނީގެ އެކިއެކި އިވެންޓްތަކުގައި ދުނިޔޭގެ ނުފޫޒު ގަދަ އެތައް ބަޔަކު ބައިވެރިވާ އިރު، ކިމްއާ އެކީ އޭނަގެ ކޮއްކޮއެއް ކަމަށްވާ ކްލޯއީ ކާޑޭޝަން ވެސް ބައިވެރިވެ އެވެ. އެ ދެ މީހުން ވެސް ހަފުލާތަކުގައި ބައިވެރިވެފައި ވަނީ އިންޑިއާގެ ސާޅީގަ އެވެ. އަދި އިންޑިއާވަންތަ ނަލަހެދިވުންތަކާ އެކީގަ އެވެ.
އިންޑިއާގެ މި ދަތުރުގައި ކިމް އާއި ކްލޯއީ އިންޑިއާގެ އެކިއެކި ކަންކަން ތަޖުރިބާ ވެސް ކޮށްފައިވެ އެވެ. އޭގެ ތެރެއިން ކުރޮޅި ބުރަކަށް ވެސް އެ ދެ މީހުން ގޮސް އުޅުނު ވީޑިއޯތަކަށް އާންމުވެފައިވެ އެވެެ.
ހަތް މަހަށް ދިގު ދެމިގެންދިޔަ އަމްބާނީގެ ކައިވެނީގެ ހަރަކާތްތައް މާދަމާ ނިމުމަކަށް އަންނާނެ އެވެ. ކައިވެނީގެ ރަސްމީ ހަފުލާ އޮތީ ހުކުރު ދުވަހުގެ ރޭ މުމްބާއީހެ ޖިއޯ ވޯލްޑް ކޮންވެންޝަން ސެންޓަރުގަ އެވެ. މި ކައިވެންޏަކީ މިހާތަނަށް އިންޑިއާގައި ބޭއްވި އެންމެ އަގުބޮޑު ކައިވެންޏެވެ.
އެގޮތުން މިކަމަށް 600 މިލިއަން ޑޮލަރު ހޭދަކޮށްފައިވާ ކަމަށް މީޑިއާތަކުން ބުނެ އެވެ.