ދިވެހި އުފެއްދުންތައް ވިއްކަން ހާއްސަ އޮތެންޓިކް މޯލްޑިވްސްގެ އައުޓްލެޓެއް އއ. ތޮއްޑޫގައި ރޭ ހުޅުވައިފި އެވެ.
ތޮއްޑޫގެ އައުޓްލެޓާ ބެހޭ ގޮތުން ބިޒްނެސް ސެންޓަ ކޯޕަރޭޝަން (ބީސީސީ) ގެ މެނޭޖިން ޑިރެކްޓަރު އިބްރާހިމް ޒިޔާއު ވިދާޅުވީ އަމާޒަކީ ދިވެހި އުފެއްދުންތެރިން އުފައްދާ ތަކެތި ރާއްޖެ އާއި ރާއްޖެއިން ބޭރުގައި މާކެޓުކޮށް ވިއްކޭނެ ފަހި ފުރުސަތުތަކެއް ހޯދައި ދިނުން ކަމަށެވެ.
އޮތެންޓިކް މޯލްޑިވްސް ތޮއްޑޫ ފިހާރަ ހުޅުވުމަށް ފަހު އެތަނުން މިއަދު ވިޔަފާރިކޮށްގެން ލިބޭ އާމްދަނީގެ 20 ޕަސެންޓް ފަލަސްތީނަށް އެހީވުމަށް ހަދިޔާ ކުރަން ނިންމާފައިވާ ކަމަށް ބީސީސީން ބުންޏެވެ.
ތޮއްޑޫ އައުޓްލެޓްގެ ސަބަބުން ސަރަހައްދުގައި ހަރަކާތްތެރިވާ އުފެއްދުންތެރިންނަށް އައު ބާޒާރުތަކަށް ފުރުސަތު ހުޅުވި، ސަރަހައްދުގެ އިގުތިސާދަށް ހެޔޮ ބަދަލުތަކެއް އަންނާނެ ކަމަށް ބީސީސީން ބުންޏެވެ.
އޯތެންޓިކް މޯލްޑިވްސް ގެ ތޮއްޑޫ އައުޓްލެޓަކީ ބީސީސީން ހުޅުވި މީގެ 5 ވަނަ ތަނެވެ. އައުޓްލެޓްތައް ހިންގަމުން އަންނަ ތަންތަނުގެ ތެރޭގައި މާލެ، ކްރޮސްރޯޑްސް، ވެލާނާ އިންޓަނޭޝަނަލް އެއާޕޯޓް، އަދި ގަން އިންޓަނޭޝަނަލް އެއާޕޯޓް ހިމެނެ އެވެ.