އިދިކޮޅު އެމްޑީޕީގެ އިސް ފަރާތްތަކުން ރައްޔިތުންގެ މަޖިލީހުގެ ރައީސް އަބްދުލްރަހީމް އަބްދުﷲ އާއި މިއަދު ބައްދަލުކުރައްވައިފި އެވެ.
އެމްޑީޕީން ބުނީ މި ބައްދަލުވުމުގައި މަޖިލީހުގައި މައިނޯރިޓީ ޕާޓީގެ ހައްގުތައް ހިމާޔަތްކޮށް، ވީހާވެސް ފުޅާކޮށް މަސައްކަތް ކުރުމުގެ ފުރުސަތު ކަށަވަރުކޮށްދިނުމަށް އެމްޑީޕީގެ ޗެއާޕާސަން ފައްޔާޒު އިސްމާއިލް އެދިވަޑައިގެންނެވި ކަމަށެވެ. އަދި، މަޖިލީހުގެ މަސައްކަތް ކުރިއަށްދާއިރު 18 ވަނަ މަޖިލީހުގައި ކަންކަން ހިނގައިދިޔަ ގޮތަށް ފުރުސަތު ނުދިނުމަށް އިލްތިމާސްކޮށްފައިވާނެ ކަމަށް އެމްޑީޕީން ބުނެ އެވެ.
މި ބައްދަލުވުމުގައި އެމްޑީޕީގެ އިސް ބޭފުޅުން ބައިވެރިވެވަޑައިގެންނެވިއިރު، މަޖިލީހުގެ ނައިބު ރައީސް އަހުމަދު ނާޒިމް އާއި ޕީއެންސީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ވެސް ބައިވެރިވެވަޑައިގެންނެވި އެވެ.
އެމްޑީޕީން ފާއިތުވި ހަފްތާގައި މަޖިލީހަށް ހުށަހެޅި ހުރިހާ ކުއްލި މައްސަލަތަކެއް ޕީއެންސީގެ މެމްބަރުން ވަނީ ބޭރުކޮށްލާފަ އެވެ. ޕީއެންސީގެ މެމްބަރުން ތުހުމަތު ކުރާ ގޮތުގައި އެމްޑީޕީން ކުއްލި މައްސަލަތައް ވައްދަނީ މަޖިލީހުގެ ވަގުތު ނަގާލުމުގެ ގޮތުންނެވެ.