ތަންކޮޅެއް އާދައިގެ ދިރިއުޅުމަކަށް ރައްޔިތުން މި ދުވަސްކޮޅު ތިރިވެލަންޖެހޭ ކަމަށް ރައީސް އޮފީހުގެ މިނިސްޓަރު އަލީ އާރިފް ވިދާޅުވެއްޖެ އެވެ.
ޕީއެންސީގެ ހަރުގޭގައި ރޭ ބޭއްވި ޖަލްސާގައި ވާހަކަދައްކަމުން އާރިފް ވިދާޅުވީ ރާއްޖޭގެ މިނިވަންކަމާއި އިސްތިގުލާލު ދަމަހައްޓައި ރައްކާތެރިކުރުމަށްޓަކާ ވެސް ހަރަދު ކުޑަކުރުމުގެ ފިޔަވަޅުތައް އަޅަންޖެހޭ ކަމަށާއި މީހަކު ބައްޔެއް ވުމުން އެ ބައްޔަށް ޝިފާއެއް އޮތީ ހިތި ބޭހެއް ބޮއެގެން ކަމަށްވާނަމަ އެ ހިތި ބޭސް ބޯންޖެހޭ ކަމަށެވެ.
މި ހާލަތުން އަރައިގަތުމަށްޓަކާ މި ސަރުކާރަށް ވެސް ފައިސާ ޗާޕު ކުރެވިދާނެ ކަމަށާއި ނަމަވެސް އެއީ ޒިންމާދާރުވެރިން ކުރާނެ ކަހަލަ ކަމެއް ނޫން ކަމަށް އާރިފް ވިދާޅުވި އެވެ. އަދި އިހުލާސްތެރި ވެރިން ކުރައްވާނެ ކަމަކީ އުނދަގޫވި ނަމަވެސް އަޅަންޖެހޭ ފިޔަވަޅުތައް އެޅުން ކަމަށާއި ރައީސް ޑރ. މުހައްމަދު މުއިއްޒު ކުރައްވަނީ އެކަން ކަމަށް އާރިފް ވިދާޅުވި އެވެ.
މިއީ ދަތި ދުވަސްކޮޅެއް ނަމަވެސް ރާއްޖެ ބަނގުރޫޓެއް ނުވާ ކަމަށާއި ރާއްޖޭގެ ކުރިމަގު ފެންނަނީ ވަރަށް ފާގަތިކޮށް ކަމަށްވެސް ވިދާޅުވި އެވެ.
"މި ދުވަސްކޮޅު މި ޖެހެނީ އެއްކަލަ އަބަދު ޓޭކްއަވޭ ހަދައިގެން ގޭގައި ކެއި ކެއުން ހުއްޓާލާފައި، ކޮންމެވެސް ވަރަކަށް ގޭތެރޭގައި އަމިއްލަ އަށް ގަރުދިޔަ އާއި ބަތާއި ކައްކައިގެން ކާލައިގެން، ތަންކޮޅެއް އާދައިގެ ދިރިއުޅުމަކަށް ތިރިވެލުން،" އާރިފް ވިދާޅުވި އެވެ.
އާރިފް ވަނީ މާލީ ހާލަތާއި ގުޅިގެން ދުވަސްވީ މީހުންނަށްދޭ އިނާޔަތްތަކާއި، ކިޔަވާ ކުދިންނަނަށްދޭ އިނާޔަތްތަކާއި އެކަނިވެރި މައިންނަށްދޭ އިނާޔަތްތައް ކަނޑާނުލާ ކަމަށާއި އެ އިނާޔަތްތައް ކަނޑާލަން އުޅޭ ކަމަށް ބުނެ ބަޔަކު ފަތުރަނީ ދޮގު ވާހަކަތަކެއް ކަމަށްވެސް ވިދާޅުވެފަ އެވެ.