އައްޑޫ ހުޅުމީދު އާއި ހިތަދުއާ ދެމެދު އަޅަން ނިންމާފައިިވާ ބްރިޖްގެ މަސައްކަތް ހަވާލުކޮށްފައިވާ ކުންފުނި، އަރަބް ކޮންޓްރެކްޓާސް އިން މިހާރު އެ މަޝްރޫއަށް ފައިސާ ހަމަޖެއްސުމަށް ހުށަހެޅި ފަރާތްތަކާ މަޝްވަރާކޮށްގެން ސަރުކާރަށް ބަލައިގަނެވޭ އަގެއްގައި އެ އިންތިޒާމި ހަމަޖެއްދސުމުގެ ކަންކަން ކުރަމުން އަންނަ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަން ވަޑައިގެން އައްޑޫ ބްރިޖާ ގުޅޭ ގޮތުން ހިތަދޫ މެދި ދާއިރާގެ މެންބަރު އަހުމަދު އަޒާން ކުރެއްވި ސުވާލެއްގެ ޖަވާބުގައި މިނިސްޓަރު ވިދާޅުވީ އައްޑޫ ބުރިޖުގެ މަޝްރޫއަކީ ސަރުކާރުން އެންމެ ބޮޑަށް އިސްކަންދޭ އެއް މަޝްރޫއު ކަމަށެވެ. މުއްތަލިބު ވިދާޅުވި އެވެ.
މިނިސްޓަރު ވިދާޅުވި މި އަހަރުގެ ފެބްރުއަރީ 19 ގައި މިސްރުގެ އަރަބް ކޮންޓްރެކްޓާސްއާ އެކީ ސޮއިކުރި އެއްބަސްވުމުގެ ދަށުން މިހާރު ކުރެވެމުން އަންނަ މަސައްކަތަކީ ފައިސާ ހަމެޖެއްސުމުގެ މަސައްކަތް ކަމަށެވެ. މުއްތަލިބު ވިދާޅުވީ މަޝްރޫއަށް ބޭނުންވާ ލޯނު ހޯދައި ދޭނީ އެ ކުންފުނިން ކަމަށާއި، ނަމަވެސް ލޯނު ނަގާނީ ސަރުކާރުން ކަމަށެވެ.
"އެ ބޭފުޅުންނަށް މި އޮންނަނީ އެމްއޯޔޫގެ ދަށުން ފައިސާ އެރޭންޖުކޮށް ދިނުން. ސަރުކާރުން ލޯނު ނަގާނީ. އެހެންވީމަ ބައެއް ފަރާތްތަކާ ވާހަކަދައްކައި އަޅުގަނޑުމެން ކުރިއަށް ގެންދާނަން." މިނިސްޓަރު ވިދާޅުވި އެވެ.
މުއްތަލިބް ވިދާޅުވީ އަރަބް ކޮންޓްރެކްޓާސް އިން ފައިސާ ހަމަޖެއްސުމަށް ހުށަހަޅާފައިވާ ގޮތްތައް ވަޒަންކޮށް އެއީ ސަރުކާރަށް ބަލައިގަނެވޭ ގޮތްތަކެއްތޯ ނުވަތަ ނޫންތޯ ބެލުމުގެ މަސައްކަތް ކުރިއަށްދާ ކަމަށެވެ. އަދި ފައިސާ ހޯދާނެ ގޮތަކާ މެދު އެއްބަސްނުވެވިއްޖެ ނަމަ އެކަން ކުރެވޭނެ އެހެން ފަރާތެއް ހޯދައިގެން މަސައްކަތް ކުރާނެ ކަމަށް ވެސް ވިދާޅުވި އެވެ.
އައްޑޫ ބްރިޖަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެގޮތުން މި އަހަރުގެ ތެރޭގައި ބްރިޖްގެ މަސައްކަތް ފަށައި، މި ދައުރުގެ ތެރޭގައި އެ މަޝްރޫއު ނިންމަވާނެކަމުގެ ޔަގީންކަން ދެއްވާފައިވެ އެވެ.
ބްރިޖާ ގުޅޭ ސާވޭތަކެއް މި އަހަރުގެ ކުރީކޮޅު ހަދާފައިވެ އެވެ.