މިދިޔަ މަހު ރިލީޒްކުރި އިންޑިއާގެ ސައިންސް ފިކްޝަން ފިލްމު "ކަލްކީ: 2898 އޭޑީ" ގެ އާމްދަނީ 1،000 ކްރޯޑް ރުޕީސް (120 މިލިއަން ޑޮލަރު) އަށް އަރައިފި އެވެ.
މިއީ އިއްޔެއާ ހަމަައަށް އިންޑިއާ އާއި ބޭރުގެ މާކެޓްތަކުން ފިލްމަށް ލިބުނު އާމްދަނީ އެވެ. މިދިޔަ މަހުގެ 27 ގައި "ކަލްކީ" ރިލީޒްކުރުމާ އެކީ ފިލްމަށް އަންނަނީ ބެލުންތެރިންގެ ބޮޑު ތަރުހީބެއް ލިބެމުންނެވެ. ކުޅަދާނަ ތެލެގޫ ޑައިރެކްޓަރު ނާގް އަޝްވިން ލިޔެ، ޑައިރެކްޓްކޮށްފައިވާ ފިލްމު ހަދާފައި ވަނީ 600 ކްރޯޑް ރުޕީސް (71.8 މިލިއަން ޑޮލަރު) ގެ ބަޖެޓަކުންނެވެ.
"ކަލްކީ" މިހާރު ވެފައި ވަނީ އިންޑިއާގެ އެންމެ ކާމިޔާބު އެއް ފިލްމަށެވެ. މި ކާމިޔާބީގެ ވާހަކަ ޑައިރެކްޓަރު އިއްޔެ އިންސްޓަގްރާމް ޕޯސްޓެއްގައި ވެސް ހިއްސާކޮށް ބުނެފައި ވަނީ ފިލްމަށް ބޮޑު ކާމިޔާބީއެއް ލިބިފައި ވަނީ ފާޑުކިޔުންތައް އަމާޒުވާ ކަހަލަ "ހަޑި" ކަންތައްތަކެއް ނެތި ކަމަށެވެ.
ނަމަވެސް ނާގީގެ އެ ޕޯސްޓަކީ މިދިޔަ އަހަރު ރިލީޒްކޮށް، ބޮޑު ކާމިޔާބީއެއް ހޯދި ބޮލީވުޑްގެ ފިލްމު "އެނިމަލް" އަށް ރައްދުވާ ޕޯސްޓެއް ކަމަށް ބައެއް މީހުން އެ ވާހަކަ ދައްކަން ފެށުމުން ޕޯސްޓް ޑިލީޓްކޮށްފައިވެ އެވެ.
"ކަލްކީ" ގެ ޖާދޫގައި ބެލުންތެރިން ޖެހިފައިވާ އިރު، މި ފިލްމުގެ މައިގަނޑު ތަރިންނަކީ ޕްރަބާސް، ދީޕިކާ ޕަދްކޯން، އަމީތާބް ބައްޗަން، ޑިޝާ ޕަޓާނީ އަދި ކަމަލް ހަސަނެވެ.
މީގެ ދެވަނަ ބައެއް ވެސް ގެނެސްދޭނެކަން ފިލްމުގެ ޓީމުން މިހާރު އޮތީ އިއުލާންކޮށްފަ އެވެ.