އިސްލާމް މާއްދާ ކިޔަވައި ދޭ މުދައްރިސުން ޤައުމީ މަންހަޖަށް އަހުލުވެރި ކުރުވުމުގެ ފަންނީ މަސައްކަތު ބައްދަލުވުމެއް ބާއްވައިފި އެވެ.
މީގެ މަގުސަދަކީ، ޤައުމީ މަންހަޖުގެ މައިގަނޑު އަސާސްތަކާ އެއްގޮތަށް ދަރިވަރުންނަށް އިސްލާމް ކިޔަވައިދޭ މުދައްރިސުން ސަމާލުކަން ދޭންވީ ކަންކަން ބުނެދިނުމާއި އިސްލާމް މާއްދާ ކިޔަވައި ދިނުމުގައި މުދައްރިސުންނަށް ކުރިމަތިވާ ގޮންޖެހުންތައް ޙައްލު ކުރުމުގައި ޢަމަލު ކުރެވިދާނެ ގޮތްތައް ބުނެދީ ކިވަ އިދިނުމުގެ ވައްޓަފާޅި އަށް ގެންނަން ޖެހޭ ބަދަލުތަކާއި ލެސަން ޕްލޭން ތައްޔާރުކުރުމުގައި ޤައުމީ މަންހަޖަށް ރިޢާޔަތްކޮށްގެން ޕްލޭން ހަދާނެ ގޮތްތަކަށް މުދައްރިސުން އަހުލުވެރިކުރެވުމެވެ.
ނެޝަނަލް އިންސްޓިޓިއުޓް އޮފް އެޑިޔުކޭޝަން (އެންއައިއީ) އިން އިންތިޒާމުކޮށްގެން އެއް ދުވަހުގެ މުއްދަތަށް ކުރިއަށް ދިޔަ ވޯކްޝޮޕްގައި މާލޭ ސްކޫލްތަކުގައި އިސްލާމް ކިޔަވައިދޭ 108 މުދައްރިސުން ބައިވެރިވި އެވެ.
މަޢުލޫމާތު ދެއްވީ އެންއައިއީގެ ސީނިއަ ކަރިކިއުލަމް ޑިވޮލޮޕްމެންޓް އެނަރލިސްޓް ޔަޢުޤޫބް ޙުސައިން ޔޫސުފާއި ކަރިކިއުލަމް ޑިވޮލޮޕްމެންޓް އެނަލިސްޓް އަޙުމަދު ޝަކީލެވެ.
ސީއެޗްއެސްއީ ހޯލުގައި ކުރިއަށް ވޯކްޝޮޕް ނިންމާލައި ބައިވެރިންނަށް ސެޓްފިކެޓް ޙަވާލު ކޮށްދެއްވީ އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ ޝިފާޒް މުޙައްމަދެވެ.