ދައުލަތުގެ ހަރަދު ކުޑަކުރިޔަސް ރައްޔިތުންނަށް ބޭނުން އެއްޗެއް ކައިގެން އުޅެވޭނެ ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން ވިދާޅުވެއްޖެ އެވެ.
އަޒާން މިހެން ވިދާޅުވެފައިވަނީ މި ދުވަސްކޮޅު ގޭތެރޭގައި އަމިއްލަ އަށް ގަރުދިޔަ އާއި ބަތާއި ކައްކައިގެން، ތަންކޮޅެއް އާދައިގެ ދިރިއުޅުމަކަށް ރައްޔިތުން ތިރިވެލަންޖެހޭ ކަމަށް ރައީސް އޮފީހުގެ މިނިސްޓަރު އަލީ އާރިފް ވިދާޅުވެފައިވާ ދަނޑިވަޅެއްގަ އެވެ.
އެކަމާ ގުޅިގެން "އެކްސް" ގައި ކުރެއްވި ޕޯސްޓެއްގައި އަޒާން ވިދާޅުވީ ސަރުކާރުގެ ހަރަދުކުޑަ ކުރުމުގެ ސިޔާސަތުގެ ދަށުން ކުޑަ ކުރަނީ ދައުލަތް ހިންގުމުގެ ހަރަދު ކަމަށާއި ރައީސް މުއިއްޒު ވަނީ ދައުލަތުގެ ހަރަދު ކުޑަކުރަން އެމަނިކުފާނު ގެންގުޅުއްވާ ބައެއް ސިޔާސަތުތައް ހާމަކުރައްވާފައި ކަމަށެވެ.
"އާންމު ރައްޔިތުންނަށް ބޭނުން އެއްޗެއް ކައިގެން އުޅެވޭނެ،" އަޒާން ވިދާޅުވި އެވެ.
ޕީއެންސީގެ ހަރުގޭގައި ރޭ ބޭއްވި ޖަލްސާގައި ވާހަކަދައްކަމުން އާރިފް ވިދާޅުވީ މިއީ ދަތި ދުވަސްކޮޅެއް ނަމަވެސް ރާއްޖެ ބަނގުރޫޓެއް ނުވާ ކަމަށާއި ރާއްޖޭގެ ކުރިމަގު ފެންނަނީ ވަރަށް ފާގަތިކޮށް ކަމަށެވެ.
"މި ދުވަސްކޮޅު މި ޖެހެނީ އެއްކަލަ އަބަދު ޓޭކްއަވޭ ހަދައިގެން ގޭގައި ކެއި ކެއުން ހުއްޓާލާފައި، ކޮންމެވެސް ވަރަކަށް ގޭތެރޭގައި އަމިއްލަ އަށް ގަރުދިޔަ އާއި ބަތާއި ކައްކައިގެން ކާލައިގެން، ތަންކޮޅެއް އާދައިގެ ދިރިއުޅުމަކަށް ތިރިވެލުން،" އާރިފް ވިދާޅުވި އެވެ.
އާރިފް ވަނީ މާލީ ހާލަތާއި ގުޅިގެން ދުވަސްވީ މީހުންނަށްދޭ އިނާޔަތްތަކާއި، ކިޔަވާ ކުދިންނަނަށްދޭ އިނާޔަތްތަކާއި އެކަނިވެރި މައިންނަށްދޭ އިނާޔަތްތައް ކަނޑާނުލާ ކަމަށާއި އެ އިނާޔަތްތައް ކަނޑާލަން އުޅޭ ކަމަށް ބުނެ ބަޔަކު ފަތުރަނީ ދޮގު ވާހަކަތަކެއް ކަމަށްވެސް ވިދާޅުވެފަ އެވެ.