ލާމަރުކަޒީ ޤާނޫނަށް އިޞްލާޙު ހުށައެޅުމަށް ޤައުމީ ޔުނިވާސިޓީން ހަދާ ދިރާސާ އަންނަ މަހުގެ ތެރޭގައި ނިމޭނެ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ މިނިސްޓަރު އާދަމް ޝަރީފު ޢުމަރު ވިދާޅުވެއްޖެ އެވެ.
އޭނަ ވިދާޅުވީ ލާމަރުކަޒީ ޤާނޫނަށް އިޞްލާޙީ ބަދަލު ގެންނަން ވާނީ ފަހަރަކު ތަންކޮޅެއް ބަދަލުކޮށް، ބާއޮޑިއެއްގައި ގަނޑުލާ އުޞޫލުން ނޫން ކަމަށާއި މުޅި ނިޒާމަށް އޭގެ ސަބަބުން ހެޔޮ ބަދަލުތައް ގެނެވޭނެ ގޮތެއްގެ މައްޗަށް ކަމަށެވެ.
"ލާމަރުކަޒީ ނިޒާމުގެ ޤާނޫނަށް ބަދަލު ގެންނަން ވާނީ ފަހަރަކު ތަންކޮޅެއް ބާއޮޑިއެއްގަ ގަނޑުލާ އުޞޫލުން ނޫން. މުޅި ނިޒާމަށް އޭގެ ސަބަބުން ހެޔޮ ބަދަލުތައް ގެނެވޭނެ ގޮތުގެ މައްޗަށް،" އާދަމް ޝަރީފު ވިދާޅިުވި އެވެ. "އެ މަގުން ކުރިއަށް ގެންދިއުމަށްޓަކައި އަޅުގަނޑު ޤައުމީ ޔުނިވަސިޓީއާއެކު ވަރަށް ގިނަ މަސައްކަތްތައް އެބަ ކުރަން. ލާމަރުކަޒީ ނިޒާމަށް ގެންނާނެ ހެޔޮ ބަދަލަކީ ކޮބާތޯ ދެނެގަތުމުގެ މަސައްކަތްތައް ކުރިއަށް ގެންދިއުމަށްޓަކައި."
މިނިސްޓަރ ވިދާޅުވީ ޔުނިވަސިޓީން ހަދާ ދިރާސާ ރިޕޯޓް މިނިސްޓްރީން އަށް ލިބުމުން އޭގެ އަލީގައި ކަމާ ގުޅުން ހުރި މުއައްސަސާތަކާއި، ސްޓޭ ކްހޯލްޑަރުންނާއި، އާންމު ރައްޔިތުންނާއި އަދި ގިނަ ބައެއްގެ ރައުޔު ހޯދުމާއެކު ލާމަރުކަޒީ ނިޒާމަށް ގެންނަން ޖެހޭ އިޞްލާޙުތައް ދެނެގަނެ އެކަމުގެ މައްޗަށް މަސައްކަތް ކުރިއަށް ގެންދެވޭނެ ކަމަށެވެ.