ކޮންމެ ދައުރެއްގައި ވެސް އެންޓި ކޮރަޕްޝަން ކޮމިޝަން (އޭސީސީ) ގެ މެންބަރުން ދައްކަނީ އެއް ވާހަކައެއް ކަމަށާއި ނަމަވެސް ވާކަމެއް ހަރާން ކަމަށް ވިދާޅުވެ ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް އެ ކޮމިޝަނަށް ބަހުގެ ހަމަލާތަކެއް އަމާޒު ކުރައްވައިފި އެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީއަށް މިއަދު އޭސީސީގެ މެމްބަރުން ހާޒިރުކޮށް ބޭއްވި ބައްދަލުވުމުގައި ނާޒިމް ވިދާޅުވީ ކޮންމެ ފަހަރަކު އޭސީސީގެ މެމްބަރުން ބަދަލު ކުރިޔަސް، އެއްވެސް ނަތީޖާއެއް ނުނެރެވޭ ކަމަށާއި ގާނޫނުތައް ބައްޓަންވެފައި އޮތް ގޮތުން ކޮރަޕްޝަނާއި ފަސާދައިގެ މެންޑޭޓް ނުވަތަ އެ މައްސަލަތައް ބެލުމުގެ ބާރު ދީފައި އޮންނަނީ އޭސީސީ އަށް ކަމަށެވެ.
އަދި މައްސަލަތަކަށް ދައުވާ ކުރަން ޖިނާއީ އިޖުރާއަތުގެ ގާނޫނުން ލިބިދެނީ އަށް އަހަރު ކަމަށްވީ ނަމަވެސް، މައްސަލަތައް އޭސީސީގައި ހިފައްޓާފައި ބޭއްވުމަށް ފަހު ކޯޓަށް ފޮނުވާއިރު އަށް އަހަރު ފާއިތުވެ ނުވަތަ އަށް އަހަރު ވާން ގާތްވެފައި ހުންނަ ކަމަށްވެސް ނާޒިމް ވިދާޅުވި އެވެ.
"ތި ބޭފުޅުން ކޮންމެ ދައުރެއްގައި ވެސް ހަމަ އެއް ވާހަކަ ދައްކަވަނީ އިނގޭތޯ. ވާ ކަމެއް ހަރާން އިނގޭތޯ. ދެން އަނެއްކާވެސް އަޅުގަނޑުމެން ވީ ތި ބޭފުޅުން ބަދަލުކުރަން. އަނެއްކާވެސް އަނެއް ފަސް މީހުން އައިސްގެން ވެސް މިހެން،" ނާޒިމް ވިދާޅުވި އެވެ.
ނާޒިމް ވަނީ އޭސީސީގެ މެމްބަރުން ބަދަލުކޮށް އާ މެމްބަރުން އައްޔަން ކުރުމުން ވެސް ވަނީ އެއްގޮތެއް ކަމަށާއި މިކަމަށް ހައްލެއް އަންނަން ޖެހޭ ކަމަށްވެސް ވިދާޅުވެފަ އެވެ.