މިއީ ވާނުވާ ނޭނގޭ ސަރުކާރެއް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެސްއެސް ޓީވީގެ "ބާރު ހަތަރެއް" ޕްރޮގްރާމުގައި ވާހަކަ ދައްކަވަމުން ފައްޔާޒު ވިދާޅުވީ ދައުލަތުގެ މާލީ ހާލަތާއި ގުޅޭގޮތުން ސަރުކާރުގެ އެކި ބޭފުޅުން އެކި ގޮތްގޮތަށް ވާހަކަދައްކަމުންދާ ކަމަށާއި އިގްތިސާދީ ހާލަތު އޮތީ ރަނގަޅަށްތޯ ނުވަތަ ގޯސްކޮށްތޯ ރައްޔިތުންނަށް ސާފުވާންޖެހޭ ކަމަށެވެ. މި ކަންކަން ސާފުކޮށް ނުދީ ޝައްކާއި ވަސްވާސްތަކެއް އުފެއްދުމުން އިންވެސްޓަރުންގެ އިތުބާރު ވެސް ގެއްލޭނެ ކަމަށާއި ސިޔާސީ ގޮތުން އެމްޑީޕީގެ ބޮލުގައި އެއްޗެހިތަކެއް އެޅުވުމުގެ ބޭނުމުގައި ދައްކާ ވާހަކައިގެ ސަބަބުން ގޮސް ސަރުކާރުން އަމިއްލަ އަށް އިގްތިސާދު ފުނޑުފުނޑުކޮށްލަނީ ކަމަށް ފައްޔާޒު ވިދާޅުވި އެވެ.
"އަޅުގަނޑު ދަންނަވާނީ ހަމަ ވާނުވާ ނޭނގޭ ސަރުކާރެކޭ މިއީ. އެންމެ ބޮޑު ކަންބޮޑުވުމަކީ އަޅުގަނޑަކަށް ނުފެނޭ މި ބޭފުޅުންގެ ގާބިލުކަން ހުރި ކަމެއް،" ފައްޔާޒު ވިދާޅުވި އެވެ.
ފައްޔާޒު ވިދާޅުވީ އާ ގާނޫނު އަސާސީއާ އެކު ފާއިތުވި ހަތަރު ވެރިން ވެސް މަސައްކަތް ކުރެއްވީ ފަސޭހަ މާހައުލެއްގައި ނޫން ކަމަށާއި އިގްތިސާދު ވެސް އޮތީ ފަސޭހަ ހާލަތެއްގައި ނޫން ކަމަށެވެ. ނަމަވެސް ހުރިހާ ސަރުކާރަކުން ވެސް ދިޔައީ މެނޭޖްކުރަމުން، 21 ވަނަ ގަރުނަށް ބޭނުންވާ ހިދުމަތްތައް ރައްޔިތުންނަށް ފޯރުކޮށްދޭން މަސައްކަތް ކުރި ކަމަށް ފައްޔާޒު ވިދާޅުވި އެވެ. ނަމަވެސް މި ސަރުކާރުން "އޮޑީގައި" އަމިއްލަ އަށް ލޯވަޅުތަކެއް އަޅައި ފައްތާލަން އުޅޭ މަންޒަރު ފެންނަ ކަމަށްވެސް ވިދާޅުވި އެވެ.
"އުނދަގޫކޮށްނޭ އަބަދުވެސް މި އޮޑި އޮތީ. އެކަމަކު އަމިއްލަ އަށް މީގައި ލޯވަޅުތަކެއް އަޅާލައި ފައްތާލަން އުޅޭތަނޭ އަޅުގަނޑަށް ފެންނަނީ،" ފައްޔާޒު ވިދާޅުވި އެވެ.