މިފްކޯގެ (ސީއީއޯ) ގެ މަގާމަށް އާތިފް ޝަކޫރު ކުރިމަތިލައްވައިފި އެވެ.
ސަރުކާރުގެ މަސް ކުންފުންޏަށް ސީއީއޯއަކު ހޯދަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން އިއުލާންކުރީ މިދިޔަ މަހުގެ 26 ގަ އެވެ. އަދި އެ ފުރުސަތު ހުޅުވައިލީ ބޭރު މީހުންނަށް ވެސް ކުރިމަތިލެވޭ ކަމަށެވެ.
މިފްކޯގެ ސީއީއޯގެ މަގާމަށް އާތިފު ކުރިމަތިލެއްވި އިރު 2004 އިން ފެށިގެން 2013 އާ ހަމައަށ އޭނަ އެ ކުންފުނީގެ އިސް މަގާމުތަކެއް ފުރުއްވާފައިވެ އެވެ. އޭގެ ތެރޭގައި އެ މިފްކޯގެ ސޭލްސް އެންޑް މާކެޓިން މެނޭޖަރުކަމާއި ޑެޕިއުޓީ މެނޭޖިން ޑިރެކްޓަރުކަމުގެ އިތުރުން މެނޭޖިން ޑިރެކްޓަރުކަން ހިމެނެއެވެ.
އާތިފު ކުރިން އެމްޓީސީސީ އާއި އެސްޓީއޯގެ މެނޭޖިން ޑިރެކްޓަރުކަން ވެސް ކުރެއްވި އެވެ. އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ އެންމެ އިސްވެރިޔާގެ މަގާމު ވެސް އާތިފު ފުރައްވާފައިވެ އެވެ.
އާތިފަކީ ކުރީގެ އެޓާނީ ޖެނެރަލް އާޒިމާ ޝަކޫރުގެ ބޭބެ އެވެ.
މިފްކޯގެ ސީއީއޯ/އެމްޑީގެ މަގާމުގައި އެންމެ ފަހުން ހުންނެވީ އަހުމަދު ސަމާހު ރަޝީދެވެ. އޭނަ އެ މަގާމުން ވަކިކޮށް، ފިޝަރީޒް މިނިސްޓްރީގެ ސްޓޭޓަކަށް އައްޔަންކުރީ މިދިޔަ މަހުގެ ތެރޭގަ އެވެ.
މިފްކޯ އަކީ ސަރުކާރުގެ އެންމެ ބޮޑު ވިޔަފާރި ކުންފުނި، އެސްޓީއޯގެ ސަބްސިޑަރީއެކެވެ. އެ ކުންފުނި ވުޖޫދަށް އައީ ނޮވެމްބަރު 1، 1993 ގަ އެވެ