ކަސްޓަމްސްގެ ބޭނުމަށް އެމެރިކާ އާއި ޗައިނާއިން ޑްރޯންތަކެއް ގެންނަން ނިންމާފައިވާ ކަމަށް ކޮމިޝަނާ ޖެނަރަލް އޮފް ކަސްޓަމްސް ޔޫސުފް މާނިއު މުހައްމަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ 241 ކޮމިޓީގައި އެ މުއައްސަސާގެ މަސައްކަތާ ބެހޭ ގޮތުން ވާހަކަ ދައްކަވަމުންނ އޭނަ ވިދާޅުވީ ރާއްޖޭގެ ބޯޑަރު ބެލެހެއްޓުމުގެ ފުރިހަމަ ގާބިލުކަން މިވަގުތު ކަސްޓަމްސްގައި ނެތް ކަމަށާއި ރާއްޖެ ވަންނަ އުޅަނދުތައް މޮނީޓާކޮށް އެ އުޅަނދުތަކާ ހަމައަށް ދަތުރުކުރުމުގެ ގާބިލުކަން ވެސް ކަސްޓަމްސްގައި ނެތް ކަމަށެވެ.
"އެހެންވެ އެމެރިކާއިން އަޅުގަނޑުމެން، އެބަގެންނަން ޑްރޯންސް ވެސް، ޗައިނާއިން ވެސް އެބަގެންނަން ޑްރޯންސް، އަޅުގަނޑުމެން އެބަ ބޭނުންވާ ޑްރޯންސް،" މާނިއު ވިދާޅުވި އެވެ. "ވާގޮތަކީ ބޭރުން މި އަންނަ ވެސަލްތައް މޮނީޓާ ކުރެވޭނެ އެއްވެސް ގޮތެއް ނޯންނާނެ އަޅުގަނޑުމެންނަކަށް."
އޭނަ ފާހަގަ ކުރެއްވި ގޮތުގައި މިހާތަނަށް އުޅަނދެއް ހުއްޓުވަން ނުވަތަ ބަލައި ފާސްކުރަން ބޭނުންވާ ނަމަ ކަސްޓަމްސް އިން ބޭނުންކުރަމުން ދިޔައީ އެމްއެންޑީއެފްގެ އެހީގައި ކޯސްޓުގާޑުގެ އުޅަނދުތަކެވެ.
މާނިއު ވިދާޅުވީ މި މައްސަލަ ހައްލުކުރުމަށް ޖަޕާނުން 85 ފޫޓުގެ އުޅަނދެއް ލިބޭނެ ކަމަށް ބުނެފައި އޮތް ކަމަށެވެ. އަދި، އަންނަ އަހަރު ޗައިނާއިން ދެ އުޅަނދާއި އެމެރިކާއިން އުޅަނދުތަކެއް ލިބޭނެ ކަމަށް މިހާތަނަށް ކުރި މަޝްވަރާތަކުން އެނގިފައިވާ ކަމަށް ވެސް ވިދާޅުވި އެވެ.