މީގެ 26 އަހަރު ކުރިން ރިލީޒްކުރި ބޮލީވުޑްގެ ކާމިޔާބު އެކްޝަން ތުރިލާ "ސޯލްޖާ" ގެ ސީކްއެލްއެއް ހަދަން ނިންމާފައިވާ ކަމަށް ޕްރޮޑިއުސަރު ރަމޭޝް ތައުރާނީ ބުނެފި އެވެ.
ނިއުސް 18 އަށް ދިން އިންޓަވިއުއެއްގައި އޭނަ ބުނީ އަންނަ އަހަރުގެ ތެރޭގައި ފިލްމުގެ ޝޫޓިން ފަށާނެ ކަމަށެވެ. އެހެންވެ "ސޯލްޖާ 2" އާ ގުޅޭ ތައްޔާރީތައް މިހާރު ވެސް ކުރިއަށްދާ ކަމަށް ބުންޏެވެ. އައްބާސް-މަސްތާން ޑައިރެކްޓްކޮށް 1998 ގައި ގެނެސްދިން "ސޯލްޖާ" ގެ ތަރިންނަކީ ބޮބީ ޑިއޯލް އާއި ޕްރިތީ ޒިންތާ އެވެ. ފިލްމުގެ ދެވަނަ ބައިން އެ ދެ ތަރިން ފެނިދާނެތޯ އެހުމުން ތައުރާނީ ބުނީ އެކަމާ ގުޅޭ ގޮތުން މި ވަގުތު އެއްޗެއް ބުނަން ދަތި ކަމަށެވެ.
ވަރަށް ގިނަ ދުވަސްތަކެއް ވަންދެން ފިލްމީ މަސައްކަތްތަކާ ދުރުގައި ހުރުމަށް ފަހު، ޕްރިތީ ދާދި ފަހުން ވަނީ ބޮބީގެ ބޭބެ، ސަނީ ޑިއޯލްއާ އެކީ "ލާހޯރް، 1947" ކިޔާ ފިލްމެއްގެ މަސައްކަތް ނިންމައިފަ އެވެ. އާމިރު ޚާން ޕްރޮޑިއުސްކޮށް، ރާޖްކުމާރު ސަންތޯޝީ ޑައިރެކްޓްކުރި ފިލްމު ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.
"ސޯލްޖާ" ގެ ދެވަނަ ބައެއް ހަދަން ނިންމި އިރު، ރަމޭޝް ޕްރޮޑިއުސްކުރި 2003 ގެ "އިޝްގް ވިޝްގް" ގެ ދެވަނަ ބައެއް "އިޝްގް ވިޝްގް ރީބައުންޑް" ގެ ނަމުގައި މުޅިން ތަފާތު ކާސްޓަކާ އެކީ މިދިޔަ މަހު ގެނެސްދީފައިވެ އެވެ.
ތައުރާނީ ޓިޕްސް ފިލްމްސް އިން މިހާރު އަންނަނީ ދަރިފުޅު ވަރޫން ދަވަން ހިމަނައިގެން ޑައިރެކްޓަރު ޑޭވިޑް ދަވަން ހަދާ 4 ވަނަ ފިލްމު "ހޭ ޖަވާނީ ތޯ އިޝްގް ހޯނާ ހޭ" ގެ މަސައްކަތް ކުރަމުންނެވެ. މި ފިލްމު ރިލީޒްކުރަން ހަމަޖެހިފައި ވަނީ އަންނަ އަހަރުގެ އޮކްޓޯބަރު 2 ގަ އެވެ.