ކުރިން ވެސް ކާމިޔާބު ލޯބީގެ ބިރުވެރި ފިލްމުތަކެއް ގެނެސްދީފައިވާ ބޮލީވުޑްގެ މަޝްހޫރު ޑައިރެކްޓަރު ބަޓް އަނެއްކާ ވެސް މި ޖޯންރާގެ ފިލްމެއް ގެނެސްދޭން ތައްޔާރުވެއްޖެ އެވެ.
މި މަހުގެ 26 ގައި ޑިޒްނީ ޕްލަސް ހޮޓްސްޓާ އިން ޕްރީމިއާކުރަން ހަމަޖެހިފައިވާ މި ފިލްމަކީ "ބްލަޑީ އިޝްގް" އެވެ. މީގެ ޓްރެއިލާ ވެސް މިހާރު އާންމުކޮށްފައިވާ އިރު، މިއީ ޔަގީނުން ވެސް ބިރުވެރި ފިލްމުތަކަށް ލޯބިކުރާ މީހުންނަށް ވަރަށް ކަމުދާނެ ފިލްމަކަށް ވާނެ އެވެ.
މަހޭޝް ބަޓްގެ ވާހަކައަކަށް ހަދާފައިވާ "ބްލަޑީ އިޝްގް" ގެ ލީޑް ތަރިންނަކީ "ބަލިކާ ވަދޫ" ސިލްސިލާ އިން މަގުބޫލުކަން ހޯދި އަވިކާ ގޯރް އާއި ހިންދީ ސިނަމާގެ ކުރީގެ ވަރުގަދަ ޝަހުސިއްޔަތު، އަމްރިޝް ޕޫރީގެ ކާފަދަރިފުޅު ވަރްދާން ޕޫރީ އެވެ.
އަވިކާ ކުރިން ވެސް ވަނީ ވިކްރަމްގެ ބިރުވެރި ފިލްމެއްގައި މަސައްކަތްކޮށްފަ އެވެ. އެއީ ވިކްރަމްގެ ދަރިފުޅު ކްރިޝްނާ ބަޓް ޑައިރެކްޓްކޮށް މިދިޔަ އަހަރު ގެނެސްދިން "1920: ހޮރޯސް އޮފް ދަ ހާޓް" އެވެ.
ވިކްރަމް ގެނެސްދިން މަގުބޫލު ލޯބީގެ ބިރުވެރި ފިލްމުތަކުގެ ތެރޭގައި "ރާޒް" ގެ ފިލްމުތަކާއި "1920" އަދި "ހޯންޓެޑް" ފާހަގަކޮށްލެވެ އެވެ.