ކަސްޓަމްސްގެ މުވައްޒަފަކު ސަސްޕެންޑްކޮށްފި

އެއާ ކާގޯއިން ވަގަށް ސިނގިރޭޓުތަކެއްގެ އެތެރެކުރި މައްސަލައެއްގައި ކަސްޓަމްސްގެ މުވައްޒަފަކު ސަސްޕެންޑްކޮށްފި އެވެ.

ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގައި ކޮމިޝަނަ ޖެނެރަލް އޮފް ކަސްޓަމްސް ޔޫސުފް މާނިޢު ވިދާޅުވީ އެ ސަސްޕެންޑްކުރީ ސްކޭން މެޝިނެއްގެ ކައިރީ މަސައްކަތްކުރި މުވައްޒަފެއް ކަމަށެވެ.

ޤަވައިދާ ޚިލާފަށް އެތެރެކުރި 1.6 މިލިޔަން ރުފިޔާގެ ސިނގިރޭޓް މިދިޔަ މަހުގެ ތެރޭގައި ކަސްޓަމްސް އިން އަތުލައިގަތެވެ. އެކަމާ ގުޅިގެން ކަސްޓަމްސް އިން އޭރު ބުނެފައި ވަނީ ކަސްޓަމްގެ އިޖުރާއަތުތައް ފުރިހަމަ ނުކޮށް، ސިއްރުން ސިނގިރޭޓްތަކެއް އެތެރެކޮށްފައިވާކަމުގެ ތުހުމަތު ކުރެވިގެން ފުލުހުންނާއި އެމްއެންޑީއެފް ގުޅިގެން ހިންގި ޚާއްސަ އޮޕަރޭޝަނުގައި 173 ކާޓަން ނުވަތަ 1.7 މިލިޔަން ސިނގިރޭޓް އަތުލައިގަތް ކަމަށެވެ.

އޭގެ މާކެޓް ވެލިއު 1.6 މިލިޔަން ރުފިޔާ އަށް އަރާ އިރު، އިމްޕޯޓް ޑިއުޓީގެ ގޮތުގައި ގާތްގަނޑަކަށް 5.6 މިލިޔަން ރުފިޔާ ދައުލަތަށް ދައްކަން ޖެހެ އެވެ.

މީގެ އިތުރުން ޓިޝޫކަމަށް ބުނެ އޮޅުވާލައިގެން ރާއްޖެ އެތެރެކުރަން އުޅުނު ގިނަ ޢަދަދެއްގެ ސިނގިރޭޓުތަކެއް ވެސް މިދިޔަ މަހު ގެ ތެރޭގައި އަތުލައިގަތެވެ. އެ ޝިޕްމަންޓުގައި ހިމެނޭ މުދާ ބަލައި ފާސްކުރިއިރު 143 ކާޓަންގެ ޓިޝޫއާއެކު 200 މާސްޓަ ކާޓަންގެ ސިނގިރޭޓު ވެސް ފެނިފައިވެ އެވެ. އެގޮތުން ޖުމްލަ 3،199،200 ސިނގިރެޓް އަތުލައިގަތެވެ.