ފްރޮންޓްލައިންގައި މަސައްކަތްކުރާ ސުޕަވައިޒަރީ ލެވެލްގެ ފުލުހުންނަށް ހާއްސަކޮށްގެން "ޓްރޯމާ އިން ޕޮލިސިން" ގެ ނަމުގައި ވޯކްޝޮޕެއް ބާއްވައިފި އެވެ.
ހޯމަ އާއި އަންގާރަ ދުވަހަށް ކުރިއަށް ގެންދިޔަ ވޯކްޝޮޕަކީ ވޯކްފޯސް ހެލްތު އެންޑް ވެލްބީން އިން، ދަ ވައިބް އަދި އެންލައިޓެން އަ މައިންޑްފުލް ކޮމިއުނިޓީ ޖަމިއިއްޔާއާ ގުޅިގެން ކުރިއަށް ގެންދިޔަ ވޯކްޝޮޕެކެވެ.
މި ވޯކްޝޮޕަކީ ފުލުހުންގެ ޚިދުމަތުގެ އިސް ސަފުގައި މަސައްކަތްކުރާ މުވައްޒަފުންނަށް، އެމީހުން ކުރިމަތިލާން ޖެހޭ ނާޒުކު އަދި ބިރުވެރި ހާދިސާތަކުން ލިބިދާނެ ނަފުސާނީ ގޮންޖެހުންތަކާ ސާބިތުކަމާއެކު ކުރިމަތިލުމުގެ ހުނަރު ދަސްކޮށް ދިނުމަށް ކުރިއަށް ގެންދިޔަ ވޯކްޝޮޕެކެވެ. މީގެ އިތުރުން، ފުލުހުންގެ ވަޒީފާގެ މަސްއޫލިއްޔަތު އަދާކުރުމުގައި ދިމާވާ ހިތްނުތަނަވަސް ވެދާނެ ފަދަ އަދި ނުރައްކާތެރި ހާދިސާތަކުގައި އަމަލުކުރާ ގޮތްތައް މިހާރަށްވުރެ އިތުރަށް ހަރުދަނާކޮށް، އެކަމަށް އަހުލުވެރިކުރުވުމެވެ.
ވޯކްޝޮޕްގައި ވަނީ ޓްރޯމާ އަދި ސްޓްރެސް އަކީ ކޮބައިކަމާއި ފުލުހުންނަށް ދިމާވާ ޓްރޯމާ އަދި އަޅާނުލައި ދޫކޮށްލެވިއްޖެ ނަމަ ކުރިމަތިވެދާނެ ކަންކަން، ޓްރޯމާގެ ސަބަބުން މީހާގެ ޖިސްމާނީ އަދި ނަފުސާނީ ދުޅަހެޔޮކަމަށް ކުރާ އަސަރުތަކާއި އެކަމުން އަރައިގަތުމަށް ނުވަތަ އަމިއްލަ ނަފުސަށް އަޅައިލުމަށް ކުރެވިދާނެ ކަންތައްތަކުގެ އިތުރުން ޓްރޯމާއާ ކުރިމަތިލާނެ ހުނަރުތައް ދަސްކޮށްދީފަ އެވެ.
މީގެ އިތުރުން އިސްލާމީ ނަޒަރަކުން، ނަފުސާނީ ދުޅަހެޔޮކަމަކީ ކޮބައިކަމާއި އީމާންތެރިކަމާއި ނަފުސާނީ ދުޅަހެޔޮކަމާ އޮންނަ ގުޅުމާ ބެހޭ ގޮތުން ވެސް މައުލޫމާތު ދީފައިވެ އެވެ.
ވޯކްޝޮޕުގައި މައުލޫމާތު ދެއްވީ ސައިކޭޓްރިސްޓް ޑރ. މައުމޫން ޝަރީފާއި ޝައިޚް އަހުމަދު ފަޙްމީދީދީ، ވިލާ ކޮލެޖްގެ ލެކްޗަރާ އަދި ސައިކޮލޮޖިސްޓް އަޒްރާ އަބްދުލް ސައްތާރުގެ އިތުރުން އެންލައިޓެން އަ މައިންޑްފުލް ކޮމިއުނިޓީގެ ފެސިލިޓޭޓަރުންނާއި ދަ ވައިބް ޖަމުއިއްޔާގެ ފެސިލިޓޭޓަރުންނެވެ.