ގޯހެއް ހެދިއްޖެ ކަމަށް ރައްޔިތުން މިހާރު ގަބޫލުކުރާ ކަމަށް މާލޭ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ރޭ ވާހަކަދައްކަމުން އާޒިމް ވިދާޅުވީ އެއްވެސް ތަނެއް ހިނގާތަނެއް މިހާރު ނުފެންނަ ކަމަށާއި ހުރިހާ ތަނެއް މިހާރު ހުރީ ހުއްޓިފައި ކަމަށެވެ. މި ދޭތެރެއިން ހދ. ކުޅުދުއްފުށި އަދި ހއ. ހޯރަފުއްޓަށް ކުރެއްވި ޒިޔާރަތުގައި ވެސް ފެނިގެންދިޔައީ ހުރިހާ މަޝްރޫއެއް މަޑުޖެހިފައި އޮތް މަންޒަރު ކަމަށާއި މިއީ ވަރަށް ހިތާމަވެރި މަންޒަރެއް ކަމަށް އާޒިމް ވިދާޅުވި އެވެ
"ރަށްރަށުގެ ރައްޔިތުން ތިބީ ވަރަށް މާޔޫސްވެފައި، ވަރަށް ދެރަވެފައި. އެމީހުން އެބަ ބުނޭ ތިމަންނަ މެންނަށް މިސްޓޭކެއް ވެސް ހެދިއްޖެއޭ،" އާޒިމް ވިދާޅުވި އެވެ.
އާޒިމް ވިދާޅުވީ ގޯސް ހެދޭނީ ވެސް އިންސާނުންނަށް ކަމަށާއި ރައްޔިތުންނަށް ނިކަމެތިކަން ލިބެން ނޭދޭ ކަމަށެވެ. ގާބިލު ނޫން މީހުން މަތީ މަގާމުތަކަށް އައްޔަން ކުރުމުގެ ބަދަލުގައި ގާބިލު މީހުން މަގާމުތަކަށް އައްޔަންކޮށްގެން ގައުމު ހަމަމަގަށް އަޅުވަން ސަރުކާރުން މަސައްކަތް ކުރަންޖެހޭ ކަމަށް އާޒިމް ވިދާޅުވި އެވެ. އަދި އެގޮތަށް ސަރުކާރުން ކުރާ މަސައްކަތަށް ދެވުނު އެއްބާރުލުމެއް ދެއްވާނެ ކަމަށްވެސް ވިދާޅުވި އެވެ.
"މިއީ އަޅުގަނޑުމެންގެ ވެސް ގައުމޭ. އަޅުގަނޑުމެން ބޭނުމެއް ނުވޭ މި ފަސް އަހަރު މިގޮތަށް ގޮސް ގައުމު ހަލާކުވެ، އިގްތިސާދު އެއްކޮށް ފުނޑިގެން ގޮސް، ވަޒީފާތައް ގެއްލި، ކުންފުނިތައް ހަލާކުވާތަން ދެކޭކަށް ބޭނުމެއް ނޫން،" އާޒިމް ވިދާޅުވި އެވެ.