މި ސަރުކާރަށް ފާއިތުވި އަށް މަސް ދުވަހުގެ ތެރޭގައި ރާއްޖެއިން ބޭރުން އެންމެ ޑޮލަރެއް ވެސް ނުލިބޭ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ރާއްޖެޓީވީގެ ޕްރޮގްރާމެއްގައި ރޭ ވާހަކަދައްކަމުން އަމީރު ވިދާޅުވީ ވެރިކަން ބަދަލުވުމުގެ މަރުހަލާގެ ތެރެއިން ބޭއްވި ބައްދަލުވުންތަކުގައި މި ސަރުކާރުގައި މިހާރު ތިއްބެވި ބޭފުޅުންގެ ފަރާތުން ފެނުނީ ބޭރު ގައުމުތަކުން ފައިސާ ލިބޭނެ ކަމުގެ ވަރަށް ބޮޑު ޔަގީންކަމެއްގައި ތިބިތަން ކަމަށާއި އެގޮތުން ދެތިން ބިލިއަން ޑޮލަރަށް ތިބީ ވަރަށް އުއްމީދުކޮށްގެން ކަމަށެވެ.
"އަދި މިދިޔަ އަށް މަސް ތެރޭގައި އެއް ޑޮލަރު ވެސް ބޭރުން ނުލިބޭ،" އަމީރު ވިދާޅުވި އެވެ.
އަމީރު ވިދާޅުވީ އޭރުވެސް އެ ބޭފުޅުން އުއްމީދުކޮށްގެން ތިބި ގޮތަށް ފައިސާ ނުލިބޭނެ ވާހަކަ ދެންނެވި ކަމަށާއި ގައުމުތަކުން ހަމަ ތިބެފައި ފައިސާ ނުދޭނެ ކަމަށެވެ. އަދި މި ސަރުކާރު މިހާރު އޮތީ "ސްކޭމް" ޕްރޮޕޯސަލްތަކެއްގައި ޖެހިފައި ކަމަށާއި އެފަދަ ތަކެއްޗަކީ ހަގީގަތެއް ކަމަށް ބަލައިގެން ދައުލަތް ހިންގަން ނިކުތުމުން ވާނެ ހަޔެތި މިހާރު މިދަނީ ވަމުން ކަމަށްވެސް ވިދާޅުވި އެވެ.
އަމީރު މިހެން ވިދާޅުވެފައިވާއިރު ދައުލަތުގެ ދަރަނި ދެއްކުމަށް ބޭނުންވާ ފައިސާ ގެންނާނެ ކަމަށް ޓުރިޒަމް މިނިސްޓަރު އިބްރާހިމް ފައިސަލް ދާދިފަހުން ވަނީ ވިދާޅުވެފަ އެވެ.
ރާއްޖޭގެ މާލީ ހާލަތާ ގުޅިގެން ބޭރުގެ މާލީ އިދާރާތަކުން ދިން ލަފަޔާއެކު، ސަރުކާރުން ވަނީ ހަރަދު ކުޑަކުރުމަށް ފިޔަވަޅުތައް އެޅުމަށް ނިންމާފަ އެވެ.