ބޮލީވުޑްގެ ކާމިޔާބު ޑައިރެކްޓަރު ރޯހިތު ޝެޓީ ހޯސްޓްކުރާ ކަލާސް ޓީވީގެ "ހަތުރޯން ކޭ ކިލާޅީ" ގެ 14 ވަނަ ސީޒަން މި މަހުގެ 27 ވަނަ ދުވަހުގެ ރޭ ޕްރީމިއާކުރަން ނިންމައިފި އެވެ.
ޝޯ ޕްރީމިއާ ކުރާނީ އެ ރޭ ރާއްޖެ ގަޑިން 9:00 ގަ އެވެ. "ހަތުރޯން ކޭ ކިލާޅީ 14" ގެ އެޕިސޯޑްތައް ކަލާސް އިން ގެނެސްދޭނީ ކޮންމެ ހަފުތާއެއްގެ ހޮނިހިރާއި އާދީއްތަ ދުވަހުގެ ރޭގަ އެވެ.
ސެލެބްރީޓީންނާ އެކީ ގެނެސްދޭ މި ސްޓަންޓް ޝޯގެ އާ ސީޒަނުން ވެސް އިންޑިއާގެ މަޝްހޫރު ސެލެބްރިޓީންތަކެއް ފެނިގެން ދާނެ އެވެ. އޭގެ ތެރޭގައި ގަޝްމީރު މަހާޖާނީ، ޝިލްޕާ ޝިންޑޭ، ނިމްރަތު ކޯރް، އަބީޝެކް ކުމާރު، އާޝިޝް މެހެރުތުރާ، ސުމޯނާ ޗަކްރަވަތީ، ޝާލިން ބެނޮޓް، ނިޔަތީ ފަތުނާނީ، އަދިތީ ޝަރުމާ އަދި ބޮލީވުޑްގެ އެކްޓަރު ޓައިގާ ޝްރޮފްގެ ކޮއްކޮ ކްރިޝްނާ ޝްރޮފް ހިމެނެ އެވެ.
"ހަތުރޯން ކޭ ކިލާޅީ 14" ކުރިއަށް ގެންގޮސްފައި ވަނީ މި ޝޯގެ ކުރީގެ ބައެއް ސީޒަންތަކެއް ވެސް ކުރިއަށް ގެންދިޔަ ރުމޭނިއާގަ އެވެ.
މިދިޔަ އަހަރު ގެނެސްދިން "ހަތުރޯން ކޭ ކިލާޅީ 13" ކާމިޔާބުކުރީ ޑީނޯ ޖޭމްސް އެވެ. މި ޝޯ އަކީ އެމެރިކާގެ މަޝްހޫރު ޝޯ "ފިއާ ފެކްޓާ" ގެ އިންޑިއާގެ ވާޝަނެވެ.