ހިރާއްޖޭގައި ހުންނަ ޕާކިސްތާނުގެ ހައި ކޮމިޝަނުން އިސްލާމިކް މިނިސްޓްރީ އަށް ކޮމްޕިއުޓަރުތަކެއް ހަދިޔާކޮށްފި އެވެ.
މީގެ ތެރޭގައި ހިމެނެނީ 10 ޑެސްކްޓޮޕާއި 7 ލެޕްޓޮޕެވެ.
އެ ތަކެތި ހަދިޔާ ކުރުމަށް މިއަދު ހެނދުނު މިނިސްޓްރީގައި ބޭއްވި ރަސްމިއްޔާތުގައި ތަކެތި ހަވާލުކޮށް ދެއްވީ ރާއްޖޭގައި ހުންނަވާ ޕާކިސްރާން ސަފީރު މުޙައްމަދު ފައްޔާޒް ގިލާނީ އެވެ. މިނިސްޓްރީގެ ފަރާތުން ތަކެއްޗާ ހަވާލުވެވަޑައގަތީ މިނިސްޓަރު ޑރ. މުޙައްމަދު ޝަހީމް ޢަލީ ސަޢީދެވެ.
ސަފީރު ވިދާޅުވީ ރާއްޖެ އާއި ޕާކިސްތާނާއި ދެމެދު ވަނީ ވަރަށް ގާތް ގުޅުމެއް ކަމަށާއި ރާއްޖެއަށް ބޭނުންވާ އެކި ކަންކަމުގައި އެހީތެރިކަން ފޯރުކޮށް ދިނުމުގައި އެ ގައުމު އަބަދުވެސް ދެމިއޮންނާނެކަމަށެވެ. މީގެ އިތުރުން އިސްލާމީ ގުޅުން ވަރުގަދަ ކުރުމަށް ދެ ޤައުމު ގުޅިގެން މަސައްކަތް ކުރައްވާނެ ކަަމަށް ވެސް ސަފީރު ވިދާޅުވި އެވެ.
ޝަހީމް ވަނީ ޕާކިސްތާނުން ރާއްޖެ އަށް، ހާއްސަކޮށް އިސްލާމިކް މިނިސްޓްރީ އަށް ދެމިން އަންނަ އެހީއަށްޓަކައި ދެއްވަމުން ޝުކުރު އަދާކުރައްވައިފަ އެވެ.