މާލޭގެ ނަރުދަމާ ޕަމްޕް ސްޓޭޝަންތަކުން ވަސްދުވުން ހުއްޓުވަން ޒަމާނީ ވަސީލަތްތައް ބޭނުންކުރަން ފަށައިފި އެވެ.
އެމްޑަބްލިއުއެސްސީން މިއަދު ބުނީ އެ ކުންފުނީގެ ނަރުދަމާ ނިޒާމުގެ ޕަމްޕް ސްޓޭޝަންތައް ގާއިމުކުރެވިފައިވާ ސަރަހައްދުތަކުގައި ހުންނަ ނޭދެވޭ ވަހުގެ ސަބަބުން އާންމު ރައްޔިތުންނަށް އުނދަގޫވުން ނިމުމަކަށް ގެނައުމަށް އަމާޒުކޮށް އެ ސަރަހައްދުތަކުން ވަސްދުވުން ހުއްޓުވުމަށް ޒަމާނީ ވަސީލަތްތައް ގާއިމުކޮށް ބޭނުންކުރަން ފަށާފައިވާ ކަމަށެވެ.
އެގޮތުން އެންމެ ފުރަތަމަ އޮޑަ ކޮންޓްރޯލް ސިސްޓަމް ބަހައްޓާ ބޭނުން ކުރަން ފަށާފައި ވަނީ އައިޖީއެމްއެޗް ސަރަހައްދުގައި ހުންނަ ހަތަރު ނަމްބަރު ޕަމްޕް ސްޓޭޝަނުގަ އެވެ. ނަރުދަމާ ނިޒާމުގެ ޕަމްޕް ސްޓޭޝަނުގެ ވެންޓިލޭޝަންއަށް މި ގެނެވުނު ބަދަލުގެ ތެރެއިން ޕަމްޕް ސްޓޭޝަންތަކުގައި މިހާރު ހުންނަ ވަސްހޮޅި ނަގައި، ޒަމާނީ އާ ނިޒާމެއް ޕަމްޕު ސްޓޭޝަންތަކުގައި ބަހައްޓާނެ އެވެ.
ފެން ކުންފުނިން ބުބީ ވައިސާފުކުރާ މި ނިޒާމުގެ ސަބަބުން ޕަމްޕް ސްޓޭޝަނުން ޖައްވުގެ ތެރެއަށްދާ ވައިގައި ހުންނަ ނޭދެވޭ ވަހުގެ މިންވަރު 99 ޕަސެންޓަށް ދަށް ކުރެވޭނެ ކަމަށެވެ.
"މި ވަސީލަތްތައް ދެން ގާއިމުކުރެވޭނީ މާލޭގެ ޕަމްޕް ސްޓޭޝަން ދޭއްގައި. އެއަށް ފަހު މާލޭގައި ގާއިމުކުރެވިފައިވާ ނުވަ ޕަމްޕް ސްޓޭޝަނުގައި މި ވަސީލަތްތައް ގާއިމުކުރުމުގެ މަސައްކަތް އެއް އަހަރުގެ މުއްދަތަށް ބަހާލައިގެން ކުރިއަށް ގެންދިއުމަށް ވަނީ ހަމަޖެހިފައި،" އެ ކުންފުނިން ބުންޏެވެ.