ރައްޔިތުންގެ މަޖިލީހުގެ މެންބަރުން ހުވާ ކުރައްވާ ދުވަހުން ފެށިގެން ތިން މަސް ދުވަހުގެ ތެރޭގައި މާލީ ބަޔާން ހުށަހަޅަންޖެހޭ ގޮތަށް މަޖިލީހުގެ އާންމު ކޮމިޓީން މިއަދު ފާސްކޮށްފި އެވެ.
އުސޫލު މިހާރު އޮތް ގޮތުން މާލީ ބަޔާން ހުށަޅަން ޖެހެނީ މަގާމުގެ ހުވާ ކުރައްވާތާ އަހަރެއް ފަހުންނެވެ. އެ ގަވާއިދުގައިވާ ގޮތުން މާލީ ބަޔާން ހުށަހަޅަން ޖެހެނީ ކޮންމެ މީލާދީ އަހަރެއްގެ ވެސް އޮގަސްޓު މަހުގެ 31 ގެ ކުރިންނެވެ.
މަޖިލީހުގެ އާންމު ކޮމިޓީ ބައްދަލުވުމުގައި މިއަދު މެންބަރުން މަޝްވަރާކުރެއްވީ މާލީ ބަޔާން ހުށަހަޅަންޖެހޭ ގޮތަށް އޮތް މާއްދާއާ ގުޅޭ ގޮތުންނެވެ.
އާންމު ކޮމިޓީގެ ބައްދަލުވުމުގައި، މަޖިލީހުގެ ކައުންސެލް ޖެނެރަލް ފާތިމަތު ފިލްޒާ އެކަމުގައި ދެއްވި ލަފާގައި ވަނީ އަލަށް މަޖިލިސް މެންބަރުކަމުގެ ހުވާކުރާ ދުވަހުން ފެށިގެން ތިން މަސް ދުވަހުގެ ތެރޭގައި އެ މެންބަރެއްގެ އަނބިން/ފިރިން އަދި ދަރީން ވެސް ހިނެނޭ ގޮތަށް މުދަލާއި ފައިސާގެ ބަޔާން އަމީންއާންމަށް ހުށަހެޅުމަށެވެ.
އަދި ކޮންމެ އަހަރަކު އެއް ފަހަރު މާލީ ބަޔާން ހުށަހަޅަން ޖެހޭނެ ކަމަށެވެ.
އެ ލަފަ އަށް ފޭދޫ ދެކުނު ދާއިރާގެ މެންބަރު އިބްރާހީމްދީދީ (އައިބީ) ތާއީދު ކުރައްވައި ވާހަކަ ދެއްކެވި ނަމަވެސް ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ވިދާޅުވީ މަޖިލިސް އިންތިހާބަށް ފަހު ވެސް މެންބަރުން ޚަރަދުތައް ކޮށްފައިވާ ގޮތުގެ ބަޔާން އޮތީ އިލެކްޝަންސް ކޮމިޝަން (އީސީ) އަށް ހުށަހަޅަޅާފައި ކަމަށެވެ. އެހެންވެ އަނެއްކާ ވެސް ތިން މަސް ދުވަހުގެ މާލީ ބަޔާނެއް ހުށަހެޅުމުން ވަކި އިތުރު ކަންތައްތަކެއް ފެންނާނެ ކަމެއް ނޫން ކަމަށް ވިދާޅުވި އެވެ.
މަޖިލިސް މެންބަރުން ހުވާ ކުރައްވާތާ އަހަރު ދުވަސް ފަހުން މާލީ ބަޔާން ހުށަހަޅަން ޖެހޭ ގޮތަށް އޮންނާތީ އެއީ ނުހައްގު މުއްސަނދިކަން ހޯދުމުގެ ފުރުސަތު ފަހިވެފައި އޮންނަ ކަމަށް ބުނެ، ޓްރާންޕޭރެންސީ މޯލްޑިވްސްއި ކަންބޮޑުވުން ފާޅުކޮށްފައިވެ އެވެ.